දේශපාලන

වසර පහකට අධික කාලයක් ගව මස් අලෙවි නොකළ වැල්ලවාය ප්‍රාදේශීය සභාවට අයත් ගව මස්කඩය 2018 වර්ෂය සඳහා ටෙන්ඩර් නොකිරීමට වැල්ලවාය ප්‍රාදේශීය සභා මාසික රැස්වීමේදී ඒකමතිකව තීරණය කර තිබේ.

මේ බවට වැල්ලවාය ප්‍රාදේශීය සභාවේ සභාපති ආර්.ඩී. හරමානිස් මාධ්‍යයට පැවසුවේය.

මේ මස්කඩය සඳහා 2013 වසරේ සිට 2016 වසර දක්වා ටෙන්ඩරයෙන් ලබාගත් ගැනුම්කරුවන් එහි මස් අලෙවියක් නොකර ප්‍රදේශයේ ගව ඝාතනයට තිත තබමින් වසා දමා තිබිණි.

ඒ සඳහා වැල්ලවාය ප්‍රාදේශීය සභාවේ හිටපු සභාපති රෝහණ වන්නිආරච්චි හා ප්‍රදේශයේ ව්‍යාපාරික ප්‍රජාව මූලිකත්වය ගෙන තිබු අතර අතර ප්‍රදේශයේ විහාරාධිපති හිමිවරුන් හා විශාල පිරිසකගේ දායකත්වය ලැබිණි.

ඒ අනුව නව සභාවේ දෙවැනි රැස්වීම් වාරයේදී මේ සම්බන්ධ නව සභාපති ආර්.ඩී. හරමානිස් මහතා සභාවට ඉදිරිපත් කළ අතර මේ මස් කඩය ටෙන්ඩර් නොකිරීම සම්බන්ධයෙන් වූ යෝජනා පොදුජන නිදහස් පෙරමුණේ ප්‍රාදේශීය සභා මන්ත්‍රි ජගත් හේමන්ත මහතා විසින් සභාවට ඉදිරිපත් කළ අතර එක්සත් ජාතික පක්ෂ මන්ත්‍රි සුනිල් ඩී. ආනන්ද මහතා හා ස්වාධීන මන්ත්‍රි යූ.එස්.පී. බණ්ඩාර යන සභිකයන් විසින් ස්ථිර කරන ලදී.

මේ අනුව එලබෙන වසරේද වැල්ලවායේ ගව මස් කඩය වසා තැබෙනු ඇත.

 

දේශපාලන

සෑම වසරකම මැයි 18 වනදා දෙමළ ජාතියේ සංහාර දිනයක් වශයෙන් නම් කොට එදින ලෝක ශෝක දිනයක් ලෙස කටයුතු කළ යුතු යැයි උතුරු පළාත් සභාවේ ළමා හා කාන්තා කටයුතු පිළිබඳ අමාත්‍ය ආනන්දි ශෂිධරන් ඉල්ලා සිටියාය.

අමාත්‍යවරිය මෙලෙස ඉල්ලා ඇත්තේ පෙරේදා (10දා) පැවති 122 වැනි පළාත් සභා සැසි වාරයේදීය.

කෙසේ වෙතත් අමාත්‍ය වරියගේ ඉල්ලීම සම්බන්ධයෙන් ඉදිරි පළාත් සභාවේදී සලකා බලන බවට සභාපති සී.වී.කේ සිවඥානම් දැනුම් දෙනු ලැබීය.

2009 වසරේ මැයි 18 වනදා ආරක්ෂක අංශ ප්‍රහාර හමුවේ එල්.ටී.ටී.ඊ. සංවිධානයේ නායක වේලුපිල්ලේ ප්‍රභාකරන් මිය ගියේය.

වසර 30කට අධික කාලයක් ලංකාව විනාශයට පත් කල මෙවැනි සාහසිකයන් වීරයන් බව‍ට පත් කිරීම විහිළු සහගත බවත් මෙවැනි අදෘශමාන ත්‍රස්තවාදී හස්තයන් තවමත් උතුරේ ක්‍රියාත්මක වන බවට ප්‍රබල සාක්ෂියක් බව දේශපාලන විචාරකයන් පවසයි.

 

දේශපාලන

ආණ්ඩුවෙන් ඉවත් වු ශ්‍රී ලංකා නිදහස් පක්ෂය නියෝජනය කළ කැබිනට්, රාජ්‍ය සහ නියෝජ්‍ය අමාත්‍යවරුන් 16 දෙනා මීට සුළු මොහොතකට පෙර පාර්ලිමේන්තු විපක්ෂයේ අසුන් ගත්හ.

ආණ්ඩු පක්ෂයේ මන්ත්‍රීවරු 16 දෙනා සභාව ආරම්භ වීමට පෙර සභාව මැදින් ගොස් විපක්ෂයේ අසුන් ගත්හ.

විපක්ෂයට පැමිණි මන්ත්‍රීවරු පිටව යද්දී එක්සත් ජාතික පක්ෂයේ මන්ත්‍රීවරු හූ හඬ නඟමින් කෑ කෝ ගැසු අතර ඒකබද්ධයේ මන්ත්‍රීවරු විසින් ඔවුන්ව අත්පොළසන් නාදයෙන් යුතුව හරසරෙන් පිළිගනු ලැබුහ.

අටවැනි පාර්ලිමේන්තුවේ දෙවැනි සැසිවාරය ආරම්භ කරමින් රාජාසන කතාව ඉදිරිපත් කළ ජනපති මෛත්‍රීපාල සිරිසේන මහතා විසින් පාර්ලිමේන්තුව හෙට (09දා) පස්වරු 1.00 දක්වා කල්දැමිණ.

බත්තරමුල්ල පාර්ලිමේන්තු වටරවුම අවට දැඩි මාර්ග තදබදයක් ඇති බව වාර්තා වෙනවා.ආණ්ඩුවෙන් ඉවත් වු ශ්‍රී ලංකා නිදහස් පක්ෂයේ මන්ත්‍රීවරුන් 16 දෙනා පිළිගැනීම සඳහා ඔවුගේ ආධාරකරුවන් පාර්ලිමේන්තුව අසලට රැස්වී සිටීම නිසා මෙලෙස පාර්ලිමේන්තු වටරවුම අවට මෙලෙස මාර්ග තදබදයක් හටගෙන තිබෙනවා.

දේශපාලන

ශ්‍රී ලංකා පොදු ජන පෙරමුණු මැයි රැලිය අද ගාල්ල සමනළ ක්‍රීඩාංගණයේදී පැවැත්වුනා.හිටපු ජනාධිපති මහින්ද රාජපක්ෂ මතාගේ ප්‍රධානත්වයෙන් මෙම රැලිය පැවැත්වුන අතර ඒ අවස්ථාවට ඒකාබද්ධ විපක්ෂයේ සියළු පක්ෂ නායකයින් රැලියට සහභාගී වී සිටියා.

ආණ්ඩුවෙන් ඉවත් වු ඇමැතිවරු 16 දෙනා අද (07) පොදුජන පෙරමුණු රැලියට සහභාගී වෙතියි බොහෝ දෙනා අතර මතයක් පැවැතියද කිසිදු අයෙක් පැමිණ නැති අතර ගම්පහ දිස්ත්‍රික් හිටපු නියෝජ්‍ය ඇමැති පණ්ඩු බණ්ඩාරනායක මහතා පමණක් මේ වන විට රැලියට සහභාගී සිටීයා.දිවයිනේ නන් දෙසින් පැමිණි පොදු ජන පෙරමුණේ අති විශාල ජනකායක් සමනල ක්‍රීඩාංගණයට රැස්ව සිටියා.

අද රැලිය අවසානයේ ජායාරුප කීපයක් මේ වන විට සමාජ ජාල මාධ්‍ය ඔස්සේ දැඩි කතාබහට ලක් වී තිබෙනවා.එනම් පවතී රැලිය අවසානයේ ගාල්ල සමනළ ක්‍රීඩාංගනය පිරිසුදු කරමින් කාටත් යහපත් ආදර්ශයක් මෙවර පොදුජන පෙරමුණෙන් ලබා දී තිබෙනවා.මිට පෙර අවස්ථාවලදී ජනතා විමුක්ති පෙරමුණද තම මැයි රැලි අවසානයේ මෙවැනි ආදර්ශමත් ක්‍රියා කර තිබෙනවා

ජායාරූප පහතින් නරඹන්න

 

දේශපාලන

ජාතික ආණ්ඩුවේ රාජ්‍ය සහ නියෝජ්‍ය අමාත්‍යවරුන් දිවුරුම් දීම මීට ටික වේලාවකට පෙර ජනාධිපති ලේකම් කාර්යාලයේදී ආරම්භ විය.කැබිනට් අමාත්‍යවරුන් 18 දෙනකු දිවුරුම් දීම ඊයේ සිදුවිය.අද දිවුරුම් දෙන රාජ්‍ය හා නියෝජ්‍ය අමාත්‍යවරුන් මෙසේය.

පාලිත රංගේ බණ්ඩාර – වාරිමාර්ග, ජලසම්පත් කළමනාකරණ සහ ආපදා කළමනාකරණ රාජ්‍ය අමාත්‍ය / දිලිප් වෙදආරච්චි – ධීවර, ජලජ සම්පත් සර්වර්ධන සහ ග්‍රාමීය ආර්ථික රාජ්‍ය අමාත්‍ය / එම් එම් ඒ එම් හිස්බුල්ලා – අධිවේගී මාර්ග සහ මාර්ග සංවර්ධන රාජ්‍ය අමාත්‍ය / මොහාන් ලාල් ග්‍රේරු – උසස් අධ්‍යාපන හා සංස්කෘතික කටයුතු රාජ්‍ය අමාත්‍ය / ඒ ඩී චම්පික ප්‍රේමදාස – වැවිලි කර්මාන්ත රාජ්‍ය අමාත්‍ය / ලක්ෂ්මන් සෙනවිරත්න – රාජ්‍ය පරිපාලන හා කළමනාකරණ රාජ්‍ය අමාත්‍ය සහ නීතිය හා සාමය රාජ්‍ය අමාත්‍ය / ශ්‍රියානි විජේවික්‍රම – ක්‍රීඩා, පළාත් සභා සහ පළාත් පාලන රාජ්‍ය අමාත්‍ය / වීරකුමාර දිසානායක – මහවැලි සංවර්ධන රාජ්‍ය අමාත්‍ය

අමීර් අලී ශිහබ්දීන් – ධීවර, ජලජ සම්පත් සංවර්ධන සහ ග්‍රාමීය ආර්ථික නියෝජ්‍ය අමාත්‍ය / දුනේෂ් ගන්කන්ද – ඉඩම් සහ පාර්ලිමේන්තු කටයුතු නියෝජ්‍ය අමාත්‍ය
රංජන් රාමනායක – සමාජ සවිබල ගැන්වීමේ නියෝජ්‍ය අමාත්‍ය / කරුණාරත්න පරණවිතාන- විද්‍යා, තාක්ෂණ හා පර්යේෂණ, නිපුණතා සංවර්ධන හා වෘත්තීය පුහුණු, කඳුරට උරුමයන් නියෝජ්‍ය අමාත්‍ය / සාරතී දුෂ්මන්ත – අධිකරණ හා බන්ධනාගාර ප්‍රතිසංස්කරණ නියොජ්‍ය අමාත්‍ය / පාලිත තේවරප්පෙරුම – තිරසාර සංවර්ධන, වනජීවී හා ප්‍රාදේශීය සංවර්ධන නියෝජ්‍ය අමාත්‍ය / මනූෂ නානායක්කාර – විදුලි සංදේශ, ඩිජිටල් යටිතල පහසුකම් හා විදේශ රැකියා නියෝජ්‍ය අමාත්‍ය / මුත්තු සිවලිංගම් – අභ්‍යන්තර කටයුතු හා වයඹ සංවර්ධන නියෝජ්‍ය අමාත්‍ය / සෙයිඩ් අලි සහීර් මවුලානා- ජාතික ඒකාබද්ධතා, සංහිදියා හා රජ්‍ය භාෂා නියෝජ්‍ය අමාත්‍ය
එච්.එම්.එම්. හාරිස් – රාජ්‍ය ව්‍යවසාය හා කඳුරට සංවර්ධන නියෝජ්‍ය අමාත්‍ය

දේශපාලන

ජාතික ආණ්ඩුවේ අමාත්‍ය මණ්ඩලය යළි දිවුරුම් දීම අද (1) ජනාධිපති ලේකම් කාර්යාලයේදී ජනාධිපති මෛත්‍රීපාල සිරිසේන මහතා ඉදිරියේදී සිදු විය.

මෙය අමාත්‍ය මණ්ඩල සංශෝධනයක් නොව අලුත් අමාත්‍ය මණ්ඩලයක් පත් කිරීමක් ලෙස රජය මීට පෙර කියා තිබුණි.

ඒ අනුව අද ඇමැතිවරු 18 දෙනෙක් දිවුරුම් දුන්හ.

ශ්‍රීලනිප සහ සන්ධාන මහ ලේකම්වරුන් දෙදෙනා ද ඒ අතර වූහ. සන්ධාන මහ ලේකම්ට හිමි වූයේ ශ්‍රීලනිප මහ ලේකම් දුමින්ද දිසානායක මහතා දරමින් සිටි කෘෂිකර්ම අමාත්‍ය ධුරයයි.

දුමින්ද දිසානායක මහතාට දිවුරුම් දුන්නේ මෙතෙක් වාරිමාර්ග සහ ජල සම්පත් කළමනාකරණ අමාත්‍ය සහ ආපදා කළමනාකරණ අමාත්‍යවරයා ලෙසය.

අාපදා කළමනාකරණ අමාත්‍යවරයා ලෙස කටයුතු කළ අනුර ප්‍රියදර්ශන යාපා මහතා දෝෂාභියෝගයෙන් පසු යහපාලන ආණ්ඩුවෙන් ඉවත් විය.

ලක්ෂ්මන් කිරිඇල්ල – රාජ්‍ය ව්‍යවසාය සංවර්ධන සහ මහනුවර සංවර්ධන අමාත්‍ය

මහින්ද අමරවීර – කෘෂිකර්ම ඇමැති

සරත් අමුණුගම – විද්‍යා හා තාක්ෂණ අමාත්‍ය

එස් බී නාවින්න – අභ්‍යන්තර කටයුතු සහ වයඹ සංවර්ධන අමාත්‍ය

දුමින්ද දිසානායක – වාරිමාර්ග සහ ජල සම්පත් කළමනාකරණ අමාත්‍ය සහ අාපදා කළමනාකරණ අමාත්‍ය

කබීර් හෂීම් – අධිවේගී මාර්ග සහ මහාමාර්ග සංවර්ධන අමාත්‍ය

පී හැරිසන් – සමාජ සවිබල ගැන්වීමේ අමාත්‍ය

තලතා අතුකෝරල – අධිකරණ සහ බන්ධනාගාර ප්‍රතිසංස්කරණ අමාත්‍ය

ෆයිසර් මුස්තාපා – ක්‍රීඩා අමාත්‍ය , පළාත් පාලන සභා සහ පාලන අමාත්‍ය

රංජිත් මද්දුමබණ්ඩාර – රාජ්‍ය පරිපාලන සහ කළමනාකරණ අමාත්‍ය , නීතිය හා සාමය අමාත්‍ය

විජිත් විජිතමුණි සොයිසා – ධීවර අමාත්‍ය සහ ග්‍රාමීය ආර්ථික අමාත්‍ය

ඩී එම් ස්වාමිනාදන් – පුනරුත්තාපන,නැවත පදිංචිකිරීමේ,උතුරු සංවර්ධන සහ හින්දු ආගමික කටයුතු අමාත්‍ය

සාගල රත්නායක – ව්‍යාපෘති කළමනාකරණ, තරුණ කටයුතු සහ දක්ෂිණ සංවර්ධන අමාත්‍ය

මනෝ ගනේෂන් – ජාතික ඒකාබද්ධතා, සංහිඳියා සහ ජාතික භාෂා පිළිබඳ අමාත්‍ය

දයා ගමගේ – සමාජ සුභසාධන සහ ප්‍රාථමික කර්මාන්ත අමාත්‍ය

ෆීල්ඩ් මාර්ෂල් සරත් ෆොන්සේකා – තිරසර සංවර්ධන, වනජීවී සහ ප්‍රාදේශීය සංවර්ධන අමාත්‍ය

විජයදාස රාජපක්ෂ – උසස් අධ්‍යාපන සහ සංස්කෘතික කටයුතු අමාත්‍ය

රවීන්ද්‍ර සමරවීර – කම්කරු සහ වෘත්තීය සමිති සබඳතා අමාත්‍ය

දේශපාලන

එක්සත් ජාතික පක්ෂයේ ප්‍රතිසංවිධාන වැඩපිළිවෙල යටතේ පක්ෂයේ ප්‍රධාන තනතුරු වලට අලුතින් තෝරා පත්කර ගැනීම ඊයේ සිදු කෙරිණි.

ඒ අනුව එක්සත්ත ජාතික පක්ෂයේ සභාපති ධූරයට උසස් අධ්‍යාපන සහ මහා මාර්ග අමාත්‍ය කබීර් හෂීම්, මහ ලේකම් තනතුරට අධ්‍යාපන අමාත්‍ය අකිල විරාජ් කාරියවසම්, ජාතික සංවිධායක ධූරයට වැවිලි කර්මාන්ත අමාත්‍ය නවීන් දිසානායක සහ භාණ්ඩාගාරික ධූරයට ජාතික ප්‍රතිපත්ති රාජ්‍ය අමාත්‍ය ආචාර්්‍ය හර්ෂද සිල්වා යන මහත්වරුන් පත් කිරීම එක්සත් ජාතික පක්ෂ දේශපාලන මණ්ඩලය තීරණය කළේය.

ඊට අමතරව එක්සත් ජාතික පක්ෂයේ නියෝජ්‍ය නායක ලෙස නිවාස සහ ඉදිකිරීම් අමාත්‍ය සජිත් ප්‍රේමදාස මහතාත් එක්සත් ජාතික පක්ෂ උප නායක වශයෙන් හිටපු මුදල් අමාත්‍ය රවී කරුණානායක මහතාත් පත් කිරීමට දේශපාලන මණ්ඩලය තීරණය කළේය.

එක්සත් ජාතික පක්ෂ දේශපාලන මණ්ඩලය කොළඹ අරලියගහ මන්දිරයේ රැස්වූයේ අග්‍රාමාත්‍ය රනිල් වික්‍රමසිංහ මහතාගේ ප්‍රධානත්වයෙනි.

එක්සත් ජාතික පක්ෂයේ ප්‍රතිසංවිධාන වැඩපිළිවෙළ යටතේ පක්ෂයේ නව නිලධාරී මණ්ඩලය පත්කිරීමෙන් අනතුරුව එජාපයේ පසුපෙල මන්ත්‍රීවරුන් ඇතුළු මැති ඇමැතිවරු පිරිසක් දැඩි විරෝධය පළ කර ඇතැයි එජාප අභ්‍යන්තර ආරංචි මාර්ග පවසයි.

එජාප ප්‍රතිසංවිධාන කිරීමේදී තමන් බලාපොරොත්තු වූ නායකත්වයේ වෙනසක් ඇතුළු පූර්ණ බලතල සහිත තනතුරුවලට පුද්ගලයින් පත් කිරීමට කටයුතු නොකිරීම හේතුවෙන් එම මන්ත්‍රීවරු පිරිස දැඩි කණස්සල්ලෙන් පසුවන බවද වාර්තා වේ.

ඒ අනුව එක්සත් ජාතික පක්ෂයේ නව තනතුරු පත්කිරීම කිසිසේත්ම බලාපොරොත්තු වූ තරම් සතුටුදායක නොවීම හේතුවෙන් ඊට විරෝධය දැක්වීමටද පසුපෙළ මන්ත්‍රීවරුන් තීරණය කර තිබේ.

මේ සම්බන්ධයෙන් සමාජ ජාල මාධ්‍ය වල පළවූ නිර්මාණ කීපයක් පහතින් නරඹන්න

 

 

දේශපාලන

ශ්‍රී ලංකා ක්‍රිකට් ආයතනයේ වංචා දූෂණ ගැන පැමිණිළි කිරීමට අල්ලස් කොමිසමට පැමිණි නියෝජ්‍ය අමාත්‍ය රන්ජන් රාමනායක එම ස්ථානයෙන් පිටව යන අවස්ථාවේ දී මහ මගදී හමුවූ පුද්ගලයෙකු එජාප ප්‍රතිසංවිධානය පිළිබඳව නියෝජ්‍ය අමාත්‍යවරයා හට දැඩි විවේචනාත්මක අදහස් පළ කළා.

මහජනයා දූෂණයට විරුද්ධව රාජපක්ෂවරු එළෙව්ව නමුත් මේ ආණ්ඩුව කිසිවක් නොකළ බවටද ඔහු චෝදනා නැගුවා.

එක්සත් ජාතික පක්ෂ පාක්ෂිකයෙක් ලෙස තමා අතිශයින් කණගාටුවන බවත් වර්තමාන නායකයින් කිසිවෙකුට හෝ පාක්ෂිකයින් කැමති නැති බවත් සජිත් ප්‍රේමදාස, නවීන් දිසානායක සහ රන්ජන් රාමනායක වැනි පිරිස් පක්ෂයේ තනතුරුවලට පත් විය යුතු බවත් ඔහු පෙන්වා දුන්නා.

“සජිත් ප්‍රේමදාස මැතිතුමාට මොකද්ද මේ වෙන්නේ? දැන් බලන්න මේ ගෑණු ටිකක් දාල් මේ කරන වැඩේ. ගෑණු ටිකක් නේ ඉන්නේ. අකිල විරාජ්ලා..”

කෙසේ වෙතත් රාමනායක නියෝජ්‍ය අමාත්‍යවරයා එම ස්ථානයෙන් පිටව ගියේ “ගෑණු ටිකක් දාලා මේ කරන වැඩේ” යනුවෙන් එම පුද්ගලයා කළ ප්‍රකාශය පළ නොකරන ලෙස ඉල්ලමින්. වීඩියෝව පහතින්…

 

දේශපාලන

වෙන්නප්පුව ප්‍රාදේශීය සභාවේ ඊයේ (11දා) පැවැති මංගල රැස්විමේදී කමිටු සඳහා සාමාජිකයන් පත්කිරීමෙන් පසු සභාවේ සිටි සමහර මන්ත්‍රීවරුන්ගේ පළමු ගැටලුව වුයේ මන්ත්‍රීවරුන්ට සන්නිවේදන දීමනාව ලබාගන්නා ආකාරය හා සභාව රැස්වන අවස්ථාවේදී දිවා ආහාරය ලබාදෙන්නේද යන්නයි.

මෙතෙක් පැවැති ප්‍රදේශීය සභාවේ මන්ත්‍රීවරුන්ට රුපියල් 3000 ක සන්නිවේදන දීමනාවක් ලබාදී ඇතැයිද එමෙන්ම සභාවේ රැස්වීම සඳහා සහභාගිවන මන්ත්‍රීවරුන්ට දිවා ආහාරය ලබාදී ඇතැයිද පැවසූ හිටපු මන්ත්‍රීවරු එය ඒ ආකාරයෙන්ම ක්‍රියාත්මක කරන ලෙසද ඉල්ලා සිටියහ.

එහෙත් මෙහිදී සභාපති විපක්ෂ නායක ඇතුළු ජ්‍යෙෂ්ඨ මන්ත්‍රීවරුන් රැසක් පවසා සිටියේ,දිවා ආහාරය සඳහා එක් අයෙකුට රුපියල් 600 ක් වැනි මුදලක් වැයවන බවත්, පසුගිය ප්‍රාදේශීය සභාවේ සිටියේ මන්ත්‍රීවරුන් 25 ක් වුවද මෙවර එය 44 ක් දක්වා වර්ධනය වීම නිසා දිවා ආහාරයට මෙන්ම සන්නිවේදන දීමනාවටද විශාල වියදමක් දැරීමට සිදුවන බැවින් එය නැවත සලකා බලා තීරණයක් ගත යුතු බවයි.

මෙම කරුණ සාකච්ඡා කිරීමේදී සභාවේ බහුතරයක් පවසා සිටියේ, කෙටි ආහාර වේලකට යාම සුදුසු බවයි. ඒ හේතුවෙන් එම වියදම් සලකා බලා ලබන සභාවාරයේදි ඒ සම්බන්ධයෙන් තීරණයක් ගැනීමට එම යෝජනාව කල් තැබීණි.

දේශපාලන

අගමැති රනිල් වික්‍රමසිංහ මහතාට එරෙහි විශ්වාස භයංගයට සහාය දුන් ශ්‍රී ලංකා නිදහස් පක්ෂයේ කැබිනට් ඇමැතිවරුන්, රාජ්‍ය ඇමැතිවරුන් සහ නියෝජ්‍ය ඇමැතිවරුන් සහ නියෝජ්‍ය කතානායකවරයා එම තනතුරුවලින් ඉල්ලා අස්වීමේ ලිපි  ජනාධිපති මෛත්‍රීපාල සිරිසේන මහතාට මීට ටික වේලාවකට පෙර භාර දුන් බව රාජ්‍ය ඇමැති ලක්ෂ්මන් යාපා අබේවර්ධන මහතා ලංකාදීපයට පැවසීය.

අද රාත්‍රී පැවැති සාකච්ඡාවකින් පසු තමන්ට ඉල්ලා අස්වීමට ජනාධිපතිවරයා අවසර දුන් බවත්, ඒ අනුව විශ්වාස භංගයට පක්ෂව ඡන්දය භාවිත කළ ශ්‍රීලනිප මැති ඇමැතිවරුන් 16 දෙනා සිය ඉල්ලා අස්වීමේ ලිපි බාර දුන් බවත් අබේවර්ධන මහතා කීවේය.

ඉල්ලා අස්වූ මැති ඇමැතිවරුන් පාර්ලිමේන්තුවේ විපක්ෂයේ සිටිමින් ජනාධිපතිවරයාට සහාය දක්වන බව ශ්‍රීලනිප මාධ්‍ය ප්‍රකාශක ඩිලාන් පෙරේරා මහතා පැවසීය.

ඉල්ලා අස්වූ කැබිනට් ඇමැතිවරුන් –  සුසිල් ප්‍රේමජයන්ත්, දයාසිරි ජයසේකර, අනුර ප්‍රියදර්ශන යාපා, ඩබ්ලිව් ඩී ජේ සෙනවිරත්න, චන්දිම වීරක්කොඩි, එස්.බී දිසානායක

ඉල්ලා අස්වූ රාජ්‍ය ඇමැතිවරුන් –  ලක්ෂ්මන් යාපා, ඩිලාන් පෙරේරා, සුදර්ශනී ප්‍රනාන්දුපුල්ලේ, සුසන්ත පුංචිනිලමේ, ටීබී ඒකානායක

ඉල්ලා අස්වූ නියෝජ්‍ය – සුමේධා ජී ජයසේන, අනුරාධ ජයරත්න, තාරානාත් බස්නායක, ලක්ෂ්මන් වසන්ත පෙරේරා

නියෝජ්‍ය කතානායක – තිලංග සුමතිපාල