ක්‍රිඩා පුවත්

ශ්‍රී ලංකාව තුළ මේ වන විට සිදුවෙමින් පවතින ප්‍රචන්ඩකාරී ක්‍රියා සම්බන්ධයෙන් කලකිරීමක් සහ පිළිකුලක් ඇති වන බව හිටපු ක්‍රිකට් ක්‍රීඩක සනත් ජයසූරිය පවසයි.

ඔහු ට්විටර් පණිවුඩයක් නිකුත් කරමින් වැඩි දුරටත් පවසන්නේ “ශ්‍රී ලංකාව තුළ මේ වන විට සිදුවෙමින් පවතින ප්‍රචන්ඩකාරී ක්‍රියා සම්බන්ධයෙන් කලකිරීමක් සහ පිළිකුලක් ඇතිවෙනවා. මා මෙය සම්පූර්ණයෙන්ම හෙළා දකින අතරම, මෙයට සම්බන්ධ සියළු පාර්ශවයන්ට නීතිය ක්‍රියාත්මක කිරීම අපේක්ෂා කරනවා. එසේම මම ශ්‍රී ලංකා ජනතාවගෙන් මෙවන් අවස්ථාවල බුද්ධිමත්ව සහ එකාවන්ව සමගියෙන් සිටින ලෙස ඉල්ලා සිටිනවා.” යනුවෙනි.

මේ අතර ශ්‍රී ලංකාව තුළ කිසිවෙකුත් ආගම හා ජාතිය හේතුවෙන් ගැටලුවකට පත්විය නොහැකි බවත් ශ්‍රී ලංකාව එක් රටක් හා එක් ජාතියක් බවත් ශ්‍රී ලංකා කණ්ඩායමේ හිටපු නායක කුමාර් සංගක්කාර සඳහන් කරයි.

මේ වන විට ඇතිව තිබෙන නොසන්සුන්කාරී තත්ත්වය පිළිබඳව සිය ට්විටර් ගිණුමෙන් ප්‍රකාශයක් කරමින් ඔහු මේ බව පවසයි.ආරදය, විශ්වාසය හා බාර ගැනීම ශ්‍රී ලංකාවේ පොදු භාවිතය විය යුතු බවත් ඔහු පවසයි. ජාතිවාදයට හා ප්‍රචණ්ඩත්වයට අවස්ථාවක් නොමැති බවත් එය නවත්වා එකා ලෙස ශක්තිමත්ව සිට ගන්නා ලෙසත් සංගා වැඩිදුරටත් සඳහන් කරයි.

වර්තමානයේ උද්ගතව ඇති නොසන්සුන්කාරී තත්ත්වය හෙළා දකින බවත් ඒ සඳහා සම්බන්ධ වූ සියලු පාර්ශ්වයන් නීතිය ඉදිරියට ගෙන ආ යුතු බවත් ශ්‍රී ලංකා කණ්ඩායමේ හිටපු නායක මහේල ජයවර්ධන මහතා පවසයි. වර්තමානයේ ඇතිව තිබෙන නොස්සුන්කාරී තත්ත්වය පිළිබඳව ට්විටර් පණිවිඩයක් යොමුකරමින් ඔහු මේ බව සඳහන් කරයි.

එසේම ආගම, ජාතිය පිළිබඳව නොසලකමින් නීතිය ක්‍රියාත්මක කළ යුතු බවත් තමන් අවුරුදු 25ක් යුද්ධයක් පැවැති කාලසීමාවකදී හැදී වැඩුණ බවත් නව පරම්පරාවට එවැනි තත්ත්වයක් යටතේ ක්‍රියාත්මක වීමට අවශ්‍ය නොවන බවත් මහේල වැඩිදුරටත් පවසයි.

 

 

ක්‍රිඩා පුවත්

ඌරුවරිගේ මල් කහවල රත්නායකට හෙන්නානිගල මහවැලි ඉඩම් ලැබුණේ කලකට පෙරය. අලුතින් ලද ඉඩමට කැමැති වුණත් නැතත් මල් කහවල රත්නායකට එහි පදිංචි වීමට සිදුවූයේ ඔහු එතරම් කල් දිවිගෙවූ දඹාන, කන්දේගම ගම්මානය මහවැලිය නිසා බිහිවූ මාදුරු ඔය වනෝද්‍යානයට ඇතුල්වීම නිසාය. අලුතින් ලද ඉඩමට සිය බිරිඳ තලාවරිගේ කරුණාවතී සහ දරු පිරිස සමග රත්නායක ඇත්තෝ පදිංචියට එනකොට තලාවරිගේ පුංචි බණ්ඩා දෑ අවුරුදු කෙන්චි පැංචෙකි. තම අත්තා මුත්තලා දිවි ගෙවූ දඹාන අවට මහ වනය එහි විසූ කුරුලු සකළයන්, සතා සීපාවා, රුක්මුදුන්හි මෙන්ම ගිරි කුළුහි බැඳි බඹර වද ඈ කී නොකී දහසක් දේ පුංචි බණ්ඩාට මතක සිටියේ යාන්තමිනි. හෙන්නානිගල මහවැලි ඉඩම්වල අලුත් පරම්පරාව සමග පුංචි බණ්ඩා දවසට දෙකට හැදී වැඩුණේය.

එහෙත් පුංචි බණ්ඩාගේ ඇඟේ දීවේ ආදි වාසී රුධිරයය. ඒ ආදිවාසී රුධිර උරුමය විටෙන් විට උණුසුම් කළේ අම්මිලා ඇත්තෝ සහ අප්පිලා ඇත්තන්ය. උඹ මෙහේ හිටියාට අමතක කරන්න එපා අපි වැද්දෝ කියලා ඔවුහු නිබඳව පුංචි බණ්ඩාට සිහි කළෝය. නිවසින් පිටවූ සැණින් පුංචි බණ්ඩාගේ ආදි වාසි උරුමය මතු විය. කැ‍ලේ කො‍ලේ දිව පැන සෙල්ලම් කිරීමට ඔහු තුළ වූයේ ලොකු වුවමනාවකි. ඔහු සිය ළමා කාලය සිහිකරනුයේ මෙසේය.

ආදි වාසීන්ගේ පෙළපත ගොඩක් වෙලාවට ගොඩ නැගෙන්නේ අම්මාගේ පාර්ශ්වය මුල්කරගෙන. මම තලාවරිගේ වුණේ ඒකයි. අපි මහවැලියට ආවට නෑයෝ තවමත් ඉන්නවා දඹාන ගමේ. දැන් අපේ නායක ඌරුවරිගේ වන්නියලෑ ඇත්තෝ මට නෑකමට බාප්පා වෙනවා.හිටපු නායක තිසා හාමිලා ඇත්තෝ මගේ සීයා වෙනවා. අපි නෑ යක්කු අදහන මිනිස්සු කියලා මගේ අම්මා නිතර කියනවා පුංචි බණ්ඩා පවසන්නේය.

තලාවරිගේ පුංචි බණ්ඩා ගැන දැන් මුළු රටම කතා කරන්නේය. ඒ ඔහු ආදිවාසීයෙකු වූ නිසා නොවේ. හද්දා පිටිසර දඹානේ ජන්ම ලාභය ලබා, හෙන්නානිගල හැදී වැඩී උස්මහත්වූ ඔහු ඔලිම්පික් උළෙල තුන් ප්‍රයාමයෙන් නියෝජනය කිරීමට සූදානම් වන්නේය. තුන් ප්‍රයාමය යනු පිහිණීම පාපැදි ධාවනය සහ මැරතන් දිවීම යන අතිශය වෙහෙසකර ක්‍රීඩාවන් තුනෙන් සැදි ක්‍රීඩාවකි. තමුන් එකී ක්‍රීඩාවට යොමු වූ අයුරු පුංචි බණ්ඩා පවසනුයේ මෙසේය.

මම ගියේ හෙන්නානිගල ඉස්කෝලෙට. මම අවුරුදු 18ක් මැරතන් දිව්වා. ඒත් ජාතික තලයේ ක්‍රීඩකයෙකු වෙන්න හිතුවේ නෑ. ආර්.එල්. ස්පිට්ල් සිය මැකී ගිය දඩමං කෘතියේ ආදි වාසීන් සමග වන මං ඔස්සේ කළ චාරිකාවක තොරතුරු කියන්නේය. එහිදී ගමා නමැති වැදි නායකයා ගැන සටහනක් තබන ස්පිට්ල් ගමා මෙන්ම බොහෝ වැද්දෝ වතුරට බිය බව පවසන්නේය. එහෙත් තලාවරිගේ පුංචි බණ්ඩා තුන්ප්‍රයාමය ක්‍රීඩකයෙකු ලෙස වැව්, පිහිණුම් තටාක මතු නොව මහා සාගරයද පිහිනා ජය ගැනීමට සූදානම්ය. තමා වතුරට හුරුවූ අයුරු ඔහුගේම වදනින් මෙසේය.

මහවැලියට ආවාට පස්සේ අපිට දඩයම් කරන්න, මී කඩන්න ලැබුණේ නෑ. අපේ පැරණි ගම්මාන මාදුරු ඔය අභය භූමියට ගියා. ඒත් අලුත් ගමේදී ධීවර කටයුතු කරන්න අපිට ඔරු ලැබුණා. මම වතුරට හුරු වුණේ ඒ ඔරු පැදිල්ලෙන්.පසු කාලීනව තම රැකියාවද වූ ධීවර කර්මාන්තයට යොදා ගත් ඔරුව පැටිවිය ගෙවමින් සිටි හීන් බණ්ඩාට ගෙන ආවේ විනෝදයකි. ඔරුවටත්, වතුරටත්, මාළු ඇල්ලීමටත් ඉක්මනින් හුරුවූ ඔහු හෙන්නානිගල ජලාශයේ එගොඩ මෙගොඩ පිහිනීමට ඉතා කෙටි කලකින්ම හුරු විය.

මම ඒ සන්දියේ පිහිනුවේ කලාවකට නොවේ. වතුරට පැනලා ජබු ජබු ගාලා නොගිලී ඉන්න තමයි පුරුදු වුණේ මෙසේ හිතේ හයියෙන් පිහිනමින් සිටි පුංචි බණ්ඩා දෙහිඅත්තකණ්ඩියේ ක්‍රීඩා නිලධාරී ජානක බණ්ඩාර නම් පුහුණුකරුට මුණගැසෙන්නේය. පුංචි බණ්ඩාගේ ක්‍රීඩා කුසලතා හඳුනාගන්නා ඔහු මැරතන් ක්‍රීඩාව දියුණු කරගන්න පුංචි බණ්ඩාට උදව් කරන්නේය. අතිශය දුෂ්කර ප්‍රදේශයක් වූ හෙන්නානිගල සිට පුහුණුව ලබනා මේ මැරතන් ක්‍රීඩකයා පිළිබඳ ටිකෙන් ටික රටුන් කතාකරන්නට පටන්ගත්තේය. ඔය අතරතුරේ හෙන්නානිගල පුංචි බණ්ඩා රූපවාහිනී වැඩසටහනකට කොළඹ එන්නේය. කොළඹ ඇත්තෝ පුංචි බණ්ඩා හරියටම දැන හඳුනා ගන්නේ ඉන් පසුවය.

පුංචි බණ්ඩාගේ ක්‍රීඩා කුසලතා රූපවාහිනියෙන් දකිනා ප්‍රකට පිහිණුම් ශූර ජූලියන් බෝලින් හෙන්නානිගල ගොස් ඔහු හමුවූයේය. එය මේ දිරිමත් තරුණයාගේ ජීවිතයේ සැබෑම හැරවුම් ලක්ෂ්‍යයක් වූයේය. ජූලියන් බෝලින් සර් මට පිහිනීම කියලා දුන්නා. අපි දැන උන්නේ එක විදිහයි. ඒත් පීනන්න ක්‍රම හතරක් තියෙනවා. ඒවා මට කියා දුන්නේ බෝලින් සර්. හෙන්නානිගල වැවේ පිහිණූූ මට කොළඹ පූල් හුරුකළේ බෝලිං සර්. ඔහු පවසන්නේ සිය පුහුණකරු ගැන උපන් බලවත් ගෞරවයෙනි.

ජූලියන් බෝලින් පුංචි බණ්ඩාට හුරුකළේ පිහිණුම් තටාකය පමණක් නොවේ. මහ සාගරයේ පිහිනීමටද හුරු කළේය. ඒත් හා පුරා කියා මුහුදේ පිහිනන්නට ගිය දිනයේ පුංචි බණ්ඩාට හීන් දාඩිය දැම්මේය. ඒ නැගෙන බිඳෙන දැවැන්ත රළගෙඩි තමා සාගර තුළට ඇද ගනිතෙයි බියෙනි. මං හා පුරා කියා මුහුදේ පීනන්න ගිය දවසේ මගේ නෝනයි දරුවයි ආවා. මට හිතුණා මං මේ මුහුදේ ගිලුනාම මේ දෙදෙන්නාට මොකද වෙන්නේ කියලා. ඉතිං මං පීනන එක පැත්තක තියලා ආපසු යන්න හැරුණා. ඒ වෙලාවේ මගේ නෝනා තමයි මට ධෛර්ය දුන්නේ අපි නෑ යක්කු අදහන මිනිස්සු, ඔයාට පීනන්න පුළුවන් කියලා දූත් ඒකම කීවා. බෝලින් සර් කීවා ‍පොඩ්ඩක්වත් බය වෙන්න එපා කියලා. අන්තිමට කිලෝමීටර් දෙක විනාඩි 57න් පීනන්න මට පුළුවන් වුණා. දවෛනි දවසේ ඊට අඩුවෙන් පීනුවා පුංචි බණ්ඩා අද පවසනුයේ සිනා සෙමිනි.

එලෙස මුහුදු පිහිණුම හුරුවූ පුංචි බණ්ඩාගේ ඉසව්ව තුන් ප්‍රයාමයයි. පසුගියදා ගාලු මුවදොර දී පැවැති අයන් මෑන් තුන් ප්‍රයාමය තරගයට සහභාගි වන්නට ඔහුට වාසනාව ලැබුණි. එහිදී කිලෝමීටර් 2ක මුහුදු පිහිනීමකින් පසු කිලෝමීටර් 90ක පාපැදි ධාවනයකින් පසු කිලෝමීටර් 21 මැරතන් ධාවනයක යෙදිය යුතුය. මේ දුෂ්කර තරගය ජයගන්නට උපරිම දරා ගැනීමක් තිබිය යුතුය. පුංචි බණ්ඩාගේ ආදිවාසී ජාන ඒ ශක්තිය ඔහුට ලබා දුන් බව ඔහු අදටත් විශ්වාස කරයි.

රටවල් 68ක තරගකරුවෝ 6000කට වඩා මේ තරගෙට සහභාගි වුණා. මම 55 වැනියාට තරගය නිමාකළා. ඇත්තටම ඒක ලොකු ජයක්. පුංචි බණ්ඩා පැවැසුවේ නිහතමානී ලෙස සිනාසෙමිනි.පුංචි බණ්ඩාගේ අරමුණ තුන් ප්‍රයාමය තරගයෙන් ඔලිම්පික් යන්නටය. එසේ ගොස් ලෝකය හමුවේ තම මවුරටට කීර්තියක් ගෙන එන්නටය. මේ වනවිට පුංචි බණ්ඩා 35 වැනි වියේ පසුවෙයි. මීට කලින් ක්‍රීඩාවට ආවනං හොඳ නැද්දැයි මම ඔහුගෙන් විමසා සිටියෙමි.
එහෙම හිතලා දැන් වැඩක් නෑනේ. මම සතුටු වෙනවා වයස තිස්පහේදී හරි ක්‍රීඩාවට එන්න ලැබුණට. තව අවුරුදු 10ක් විතර ක්‍රීඩා කරන්නත් පුළුවන් බව මට විශ්වාසයි. යමක් කරනවා නං අවුරුදු 10ක් හොඳටම ඇති. පුංචි බණ්ඩා සිනා සෙමින් පවසන්නේය.

ක්‍රිඩා පුවත්

කණ්ඩායමක් ලෙස නොව පවුලක් ලෙස තරග කිරීම කණ්ඩායමේ ජයග්‍රහණයට හේතු වූ බව ශ්‍රී ලංකා කණ්ඩායමේ තාවකාලික විස්සයි20 නායක දිනේෂ් චන්දිමාල් පැවසීය. බංග්ලාදේශ කණ්ඩායම හා ඊයේ (18දා) පැවැති දෙවැනි විස්සයි20 තරගයෙන් ද ලකුණු 75ක ජයක් වාර්තා කිරීමෙන් අනතුරුව පැ‍වති මාධ්‍ය හමුවකදී ඔහු මේ බව පැවැසීය.

“ අපිට ඇත්තටම නරක වසර කිහිපයක් තිබුණා. මම හිතනවා දැන් ක්‍රීඩකයන්ට හොද විශ්වාසයක් ලැබී තිබෙනවා. තරගයට පෙරාතුවත් කීවේ අපි කණ්ඩායමක් ලෙස නොව පවුලක් වශයෙන් ක්‍රීඩා කරන බවයි. ඒක තමයි ප්‍රධාන දේ. අපට දැන් හොඳ ජ්‍යෙෂ්ඨ හා තරුණ ක්‍රීඩකයන්ගේ මිශ්‍රණයක් තිබෙනවා” යැයි ඔහු පැවසීය.

එසේම ආරම්භක පිතිකරුවෙකු ලෙස කුසල් මෙන්ඩිස් සාර්ථක වූ බවත් ඔහුට ලැබුණ අවස්ථාවෙන් ප්‍රයෝජන ගත් බවත් චන්දිමාල් වැඩිදුරටත් පවසා සිටියේය.

ක්‍රිඩා පුවත්

සත්කාරක බංග්ලාදේශ කණ්ඩායම පරාජය කරමින් දෙරට අතර පැවැති දෙවැනි හා අවසන් විස්සයි20 තරගයෙන්ද ලකුණු 75ක ජයක් වාර්තා කිරීමට ශ්‍රී ලංකා කණ්ඩායම සමත්විය. ඒ අනුව විස්සයි20 තරගාවලියද 2-0ක් ලෙස ශ්‍රී ලංකා කණ්ඩායම ජයග්‍රහණය කළේය.

මුලින්ම පන්දුවට පහරදුන් ශ්‍රී ලංකා කණ්ඩායම ලකුණු 210/4ක් රැස්කළ අතර පිළිතුරු ඉනිම ක්‍රිඩා කළ බංග්ලාදේශ කණ්ඩායමට රැස්කළ හැකිවූයේ ලකුණු 135/10 පමණි.

තරගයේ වීරයා හා තරගාවලියේ වීරයා ලෙස කුසල් මෙන්ඩිස් සම්මාන ලැබීය.

අද තරඟයේ විශේෂ අවස්ථා සහිත වීඩියෝව සහ සමාජ ජාල මාධ්‍ය වල පළවූ නිර්මාණ කීපයක් පහතින් නරඹන්න

 

 

 

ක්‍රිඩා පුවත්

සංචාරක ශ්‍රී ලංකා කණ්ඩායම හා සත්කාරක බංග්ලාදේශ කණ්ඩායම අතර බංග්ලාදේශයේ ඩකා නුවරදී පැවැති පළමු විස්සයි20 තරගයේ ජය වාර්තා කිරීමට ශ්‍රී ලංකා කණ්ඩායම සමත්විය.

බංග්ලාදේශයෙන් එල්ල වූ ලකුණු 194ක ඉලක්කය පන්දුවාර 16.4කදී කඩුලු 4ක් පමණක් වැය කර සම්පූර්ණ කිරීමට ශ්‍රී ලංකා කණ්ඩායම සමත්විය.

කාසියේ වාසිය දිනූ බංග්ලදේශය මුලින්ම පන්දුවට පහරදෙමින් ලකුණු 193/5ක් රැස්කළේය. සෞම්‍ය සර්කාර් හා මුෂ්ෆිකාර් රහීම් අර්ධ ශතක රැස්කරමින් බංග්ලාදේශ ඉනිම ශක්තිමත් කළහ.ජීවන් මෙන්ඩිස් කඩුලු දෙකක්  දවා ගැනීමට සමත්විය.

ශ්‍රී ලංකා කණ්ඩායම වෙනුවෙන් සාර්ථක ආරම්භයක් ලබාදුන් කුසල් මෙන්ඩිස් (53) හා ධනුෂ්ක ගුණතිලක (30) පන්දුවා 4.5කදී 52ක් රැස්කළෝය.  ඉන් අනතුරුව දසුන් ශානක (42) හා තිසර පෙරේරා (39) වේගවත් ඉනිමක් ක්‍රීඩා කරමින් ශ්‍රී ලංකාව තරගයේ ජයග්‍රහණය කරා රැගෙන ගියෝය. තරගයේ වීරයා බවට කුසල් මෙන්ඩිස් පත්විය.

මෙය ශ්‍රී ලංකා කණ්ඩායම වැඩිම විස්සයි20 ලකුණු ප්‍රමාණයක් හඹාගොස් ලබාගත් ජයග්‍රහණය ලෙස වාර්තා අතරට එක්වෙයි. එසේම අඛණ්ඩව විස්සයි20 තරග 8ක් පරාජට පත්වෙමින් ආ ගමනේ නිමාවද  වෙයි.

ඊයේ තරඟයේ විශේෂ අවස්ථා සහ සමාජ ජාල  මාධ්‍ය වල පළවූ නිර්මාණ පහතින් නරඹන්න 

 

ක්‍රිඩා පුවත්

මෙවර නිදහස් දිනය වෙනුවෙන් බන්ධනාගාර රැඳවියන් අතර ක්‍රිකට් තරඟයක් පැවැත්වුවා. මෙහිදී ජීවිතාන්තය දක්වා සිරදඬුවම් ලැබූ සිරකරුවන්ගෙන් සමන්විත එක පිලක් සහ අනෙකුත් සිරකරුවන්ගෙන් සමන්විත කණ්ඩායම තරංග වැදුනා.

මෙය නැරඹීමට සුපිරි ක්‍රිකට් ක්‍රීඩකයන් දෙපලක් වූ කුමාර් සංගක්කාර සහ රොෂාන් මහානාම පැමිණ සිටියා. මෙහිදී කාගේත් අවධානය දිනාගනිමින් වෙලේ සුදා ක්‍රීඩා කළා. ඔහු ලසිත් මාලින්ග් මෙන් ඉතා වේගයෙන් පන්දු යැවීම කාගේත් සිත් ගත්තා.

එම අවස්තාවේ වීඩියෝව පහතින් නරඹන්න.

 

ක්‍රිඩා පුවත්

කාලයක් තිස්සේ පැවති ක්‍රිකට් ඉඩෝරය නිමා කරමින් ශ්‍රී ලංකා ක්‍රිකට් කණ්ඩායම තරගාවලි ජයක් ලබා ගත්තා. මෙම ජයග්‍රහනයට කණ්ඩායමේ එකමුතුකම , නායකත්වය ඉතා ඉහලින් බලපෑ බව විචාරක මතයද වූවා.

ඊයේ දින (27) ලබා ගත් තරගාවලි ජයග්‍රහනය ලබා ගැනීමට පෙර තරගයේද ශ්‍රී ලංකා කණ්ඩායම බංග්ලාදේශය පරාජය කළා. එම ජය සැමරීමට සහ කණ්ඩායම අවසන් මහා තරගය සදහා දිරිමත් කිරීමට ශ්‍රී ලංකා නායකයා දිනේෂ් චන්දිමාල් යොදාගෙන තිබුණේ අපූරූ ක්‍රමයක්.

ඒ අවස්ථාවේ විඩීයෝව පහතින්

https://youtu.be/o3VPkZA3rmc

ශ්‍රී ලංකාව , බංග්ලාදේශය සහ සිම්බාබ්වේ කණ්ඩායම් ක්‍රීඩා කළ තුන්කෝන් ක්‍රිකට්‍ තරගාවලියේ අවසන් මහා තරගය ඊයේ පැවැත්වුණා.ඒ සත්කාරක බංග්ලාදේශ කණ්ඩායම සහ ශ්‍රී ලංකා කණ්ඩායම අතරයි.තරගයෙන් විශිෂ්ට ජයක් ලැබූ ශ්‍රී ලංකා කණ්ඩායම තරගාවලිය ජය ගැනීමටද සමත් වුනා.මේ ජයත් සමඟ ශ්‍රී ලංකා ප්‍රේක්ෂකයින් ලැබූ සතුට ගැන මුහුණුපොතේ හුවමාරු වුණු Postවලින්ම තේරුම් ගන්න පුළුවන්.පාඨකයින්ගේ රසවින්දනය උදෙසා එවැනි post කිහිපයක් අපි මෙලෙස ගෙන එන්න හිතුවා.

 

ක්‍රිඩා පුවත්

ශ්‍රී ලාංකිකයන්ගේ පමණක් නොව ලොව පුරා ක්‍රිකට් ලෝලීන්ගේ සදාකාලික මතකයෙන් ඉවත් නොවන ක්‍රිකට් ක්‍රීඩාවේ පුරාවෘත්තයක් බඳු සුපිිරි ක්‍රිකට් පිතිකරුවෙකු මෙන්ම නායකයෙකු වුණු මහේල ජයවර්ධනගේ විවාහ ජීවිතය දෙදරා ගොස් ඇති බව ආරංචි අන්තර්ජාලය ඔස්සේ පැතිරෙමින් තිබේ.

කලක් රට වෙනුවෙන් විශාල සේවයක් කළ මහේල කණ්ඩායමේ නායකයා ලෙස කටයුතු කර පසුව උපනායකත්වයට පත්වූ එකම ක්‍රීඩකයාත් ඔහුයි.
බිරිඳ වන ක්‍රිස්ටිනාගේ නම සහ මහේලගේ නම එකතු කොට @chrismahelaj ලෙස Instagram හි සිටි අතර දැන් එය @mahela27 ලෙස වෙනස් කර තිබේ. විවාහය දෙදරා ගිය පසු එය වෙනස් කර ඇති බව බොහෝ දෙනාගේ අදහසයි.

කෙසේ වෙතත් මෙම ක්‍රීඩකයාගේ විවාහයේ බිඳ වැටීම පිළිබදව සමාජයේ විවිධ තොරතුරු හුවමාරු වීමට ආරම්භ වී තිබෙනවා. මේ අතර මෙම දික්කසාදයට හේතුව හිටපු සුපිරි ක්‍රීඩකයා “දෙවෙනි ඉනිමක්” ආරම්භ කිරීමට සුදානමින් සිටින බවට පුවතක් සමාජජාලා වෙබ් අඩවි වල පළව තිබුණා.

තවද මෙම විවාහයෙන් සුපිරි මහේලට දියනියක සිටින අතර , එම දියණියගේ අයිතියද මවට ලැබී තිබෙන බවටද තොරතුරු වාර්තා වෙනවා.

ක්‍රිඩා පුවත්

බංග්ලාදේශයේ පැවැත්වෙන තුන්කොන් එක්දින ක්‍රිකට් තරගාවලියේ ශ්‍රී ලංකා කණ්ඩායම හා බංග්ලාදේශ කණ්ඩායම අතර අද පැවැති තරගයේ  කාසියේ වාසිය දිනාගත් බංග්ලාදේශ කණ්ඩායම මුලින්ම පන්දුවට පහරදීමට තීරණය කළේය.

මුලින්ම පන්දුවට පහරදුන් බංග්ලාදේශ කණ්ඩායම ලකුණු 82කට සීමා කිරීමට ශ්‍රී ලංකා පන්දු යවන්නෝ සමත්වූහ. සුරංග ලක්මාල් කඩුලු 3ක් දවා ගත් අතර ලක්ෂාන් සඳකැන්, දුෂ්මන්ත චමීර හා තිසර පෙරේරා කඩුලු 2 බැගින් දවාගත්හ.බංග්ලාදේශ ඉනිමේ ඉහළම ලකුණු සංඛ්‍යාව මුෂ්ෆිකාර් රහීම් (26) වාර්තා කිරීමට සමත්විය.

පිළිතුරු ඉනිම ක්‍රීඩා කළ ශ්‍රී ලංකා කණ්ඩායම පන්දුවාර 11.5කදී ලංකාව කඩුලු 10ක ජයක් ලබමින්  ඉලක්කය පසුකර ගියේය. ධනුෂ්ක ගුණතිලක (35*) හා උපුල් තරංග (37*) ශ්‍රී ලංකා කණ්ඩායම ජයග්‍රහණය කරා රැගෙන ගියහ. අවසන් මහ තරගය සෙනසුරාදා (27දා) පැවැත්වීමට නියමිතය.

අද තරගය පිළිබඳව සමාජ ජාල වෙබ්  අඩවි වල පළ වු අදහස් පහතින් නරඹන්න.

 

 

 

ක්‍රිඩා පුවත්

මේ වසරේදී රුසියාවේ පැවැත්වෙන පාපන්දු ලෝක කුසලාන තරගාවලියට සමගාවීම එහි ජයග්‍රාහකයන් වෙනුවෙන් ලබාදෙන ලෝක කුසලානය ලෝකයේ රටවල් වල ප්‍රදර්ශනය කිරීමට සමගාමීව එම කුසලානය ප්‍රථමයෙන්ම ශ්‍රී ලංකාවට ගෙන ඒමට නියමිතය.

ඒ සඳහා විශේෂිත ගුවන් යානයක් සූදානම් කර ඇති අතර අද සවස කුසලානය රැගෙන එම යානය කටුනායක ගුවන් තොටුපොළට ළගා වීමට නියමිතය. කුසලානය රටවල් 51ක් තුළ ප්‍රදර්ශනය කිරීමට නියමිතය.

ජනපති මෛත්‍රීපාල සිරිසේන මහතා විසින් අද රාත්‍රියේ කුසලානය මහ ජනතාවට ප්‍රදර්ශනය කිරීම නිල වශයෙන් සිදුකිරීමට නියමිතය. හෙට එය මහජනතාවගේ දැක ගැනීම වෙනුවෙන් බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලා පරිශයේ තැබීමට නියමිතය.

ජායාරූප පහතින් නරඹන්න