ක්‍රිඩා පුවත්

ශ්‍රී ලංකා ක්‍රිකට් ක්‍රීඩකයන්ට මේ දවස්වල හොඳ කල දසාවක් ලබලා තියෙනවා. ඒ ක්‍රිකට් ආයතනය ඔවුන්ගේ පඩි වැඩි කිරීම නිසා.

ජාතික කණ්ඩායමේ ක්‍රීඩකයින්ට අලුත් කොන්ත්‍රාත්තුවක් ලබා දීලා තියෙනවා. ටෙස්ට් ක්‍රීඩා කරන ක්‍රීඩකයින්ට නම් වැඩි වාසියක් ලැබිලා තියෙනවා.

ටෙස්ට්, එක්දින වගේම T20 තරඟ ගාස්තුත් වැඩි කරලා තියෙනවා. සමහර ගාස්තු වැඩි කරද්දී මිට කලින් තිබ්බ ක්‍රමයට වැඩ වෙනස් ක්‍රමයක් තමයි භාවිතා කරලා තියෙන්නේ.

මිට අවුරුද්දකට කලින් ටෙස්ට් තරඟයක් සඳහා ක්‍රීඩකයෙක්ට ඇමෙරිකාන් ඩොලර් 7500 ක් ලබා දුන්නා. හැබැයි ගිය අවුරුද්දේ ඒ ගාස්තුව ඇමෙරිකන් ඩොලර් 5000 දක්වා අඩු කරා.

හැබැයි මේ අවුරුද්දේ ආයේත් ඒ මුදල ඩොලර් 7000 දක්වා වැඩි කරලා තියෙනවා. ඒ කියන්නේ රුපියල් ලක්ෂ 11 කට වැඩි මුදලක්.

ඒ වගේම ක්‍රීඩකයින් ලබා ගන්නා ශතක, අර්ධ ශතක සහ කඩුලු අනුවත් දීමනා ගෙවීමේ ක්‍රමයක් හදුන්වලා දීලා තියෙනවා.

ක්‍රිඩා පුවත්

ක්‍රිකට් තරඟයක ජයග්‍රහණයට බලපාන එක සාධකයක් තමයි කාසියේ වාසිය. පිටියේ දෝලනය සහ කාලගුණය අනුව මුලින්ම පන්දුවට පහර දෙනවාද නැද්ද කියලා තීරණය කරන්න කාසියේ ගොඩක් වැදගත්. 1877 මාර්තු මාසයේ තිබ්බ පළවෙනි ජාත්‍යන්තර ක්‍රිකට් තරඟයේ ඉඳලාම කාසියේ වාසිය උරගා බැලීම සිද්ධ වෙනවා.

හැබැයි ICC ය ආන්දෝලනාත්මක තීරණයක් ගන්න යනවා. ඒ ටෙස්ට් තරඟවල කාසියේ වාසිය උරගා බලන එක නවත්වන්න. ඒ වෙනුවට සංචාරක කණ්ඩායමේ නායකයට අවස්ථාව දෙනවා මුලින්ම පන්දුවට පහර දෙනවද නැද්ද කියලා තීරණය කරන්න. 2019 ඉදන් තමයි ICC මේ අලුත් නිතිය හදුන්වා දෙන්න යන්නේ. ඕස්ට්‍රේලියාවේ හිටපු පුහුණුකරු ඩැරන් ලීමන් තමයි මේ නිතිය ගෙන්න මුලික වෙලා තියෙන්නේ.

මේ වෙද්දී සත්කාරක රටට වාසි වෙන විදියට තණතිල්ල සකස් කරන්න ගොඩක් රටවල් පෙළඹිලා තියෙනවා. ඒ නිසා තමයි මේ අලුත් නිතිය ගේන්න හදන්නේ. සංචාරක කණ්ඩායමට මුලින්ම පන්දුවට පහර දෙනවද නැද්ද කියලා තෝරන්න දුන්නම සමබර තණතිල්ලක් සකස් කරයි කියලයි ICC ය කියන්නේ.

කොහොම වුනත් මේ ගැන තාමත් හරි තීරණයක් ICC ය අරගෙන නෑ. මැයි මාසයේ මුම්බායි වල තියෙන ICC රැස්වීමේදී අවසන් තීරණය ගන්න නියමිතයි.

ක්‍රිඩා පුවත්

අපේ රටෙන් බිහිවුණු සුපිරි ක්‍රිකට් ක්‍රීඩකයෙක් තමයි කුමාර් සංගක්කාර කියන්නේ.ක්‍රිකට් ක්‍රීඩාවේ රන් දෙවොල “ලෝඩ්ස් ක්‍රීඩාංගනය”. ඕනෑම ක්‍රිකට් ක්‍රීඩකයෙකුගේ ලොකුම හීනය තමයි ලෝඩ්ස් පිටියේ ක්‍රීඩා කරන එක.

කුමාර සංගක්කාර කියන්නේ ලෝඩ්ස් පිටියේ අමරණිය මතකයන් එකතු කල ක්‍රීඩකයෙක්.සංගා ගැන මේ වෙද්දි ලෝකයම කතා කරන්න පටන් අරන්.ඒ මතකයන් වැඩි කරමින් ලෝඩ්ස් පිටියේ අමරණීය පුද්ගලයෙක් වෙන්න සංගාට පුළුවන් වුණා.ඒ ලෝක පූජිත ක්‍රීඩාංගණයක් වන ලෝඩ්ස් ක්‍රීඩාංගණයේ කොටසක් සංගා විසින් මිලදී ගෙන ඇති බවට පැතිරෙන ආරංචියත් සමඟ.

එම වාර්තාවල දැක්වෙන්නේ එම ක්‍රීඩාංගණයේ කොටස් ක්‍රීඩකයන්ට මෙන්ම ප්‍රෙක්ෂකයන්ටද මිලදීගත හැකි බවයි.ඒ සඳහා ගෙවිය යුතු පවුම් 500 ක්.ජීවිතයේ එක්වරක් පමණක් හිමිවන මෙම අවස්ථාව හිමිකරගත් ප්‍රථමයා විදිහට සංගා ඉතිහාසයට එක්වන බවයි විදෙස් මාධ්‍ය වාර්තා කරන්නේ.

ක්‍රිඩා පුවත්

කොළඹදී පැවැත්වූ සුහද රග්බි තරඟාවලියක් සඳහා මෙරටට පැමිණ සිටියදී හදිසියේ රෝගාතුර වී මියගිය බ්‍රිතාන්‍ය රග්බි ක්‍රීඩකයන් දෙදෙනා මරණයට පෙර අධික ලෙස මත්පැන් සහ කොකේන් මත්කුඩු පානය කර ඇති බවට හෙළි වී ඇති බව පොලිස් ආරංචි මාර්ග කියයි.

සිද්ධිය වූ දිනයේ මොවුන් ගමන්ගත් ත්‍රීරෝද රථයක රියදුරෙකු ඔවුන්ට මෙම කොකෙන් මත්කුඩු ලබාදී ඇති බවටද තොරතුරු ලැබුණ බව පොලිසිය පවසයි.

ඊයේ (15) මියගිය බෙට් තෝමස් රීඩ් 27 හැවිරිදි ක්‍රීඩකයා මියයාමට පෙර අසාධ්‍ය තත්ත්වයෙන් සිටියදී මේ සම්බන්ධයෙන් පොලිසියට ප්‍රකාශයක් ලබාදී ඇති බවත් එසේම රෝගාතුර වී සිටියදී ඔහුගේ මිතුරන්ටද ඒ බව දැනුම් දී ඇති බවත් උසස් පොලිස් නිලධාරියෙක් පැවසීය.

ඉකුත් 13 වැනි දින මොවුන් කොල්ලුපිටියේ රාත්‍රී සමාජ ශලාවක සිට ත්‍රීරෝද රථයකට ගොඩවී ඇති අතර එම ත්‍රීරෝද රථ රියදුරු මොවුන්ට කොකේන් ලබා දී ඇති බවද එම උසස් පොලිසිය නිලධාරියා කීය.

මොවුන්ට කොකේන් ලබාදුන් බව කියන ත්‍රීරෝද රථ රියදුරු අත්ඩංගුවට ගැනීමට අවශ්‍ය කටයුතු සිදුකරන බවද පොලිසිය සඳහන් කරයි.

මෙදින මෙම ක්‍රීඩකයන් දෙදෙනා අවස්ථා කිහිපයකම අධික ලෙස විවිධ වර්ගයේ මත්පැන් පානය කර ඇති බවත් මත් පැන් වලට අමතර කොකේන් මත්කුඩු ද පානය කිරීමෙන් මොවුන්ට ඒවා ඔරොත්තු නොදී ඇති බවට සැකකරන බවද පොලිස් ආරංචි මාර්ග සඳහන් කරයි.

 

ක්‍රිඩා පුවත්

එදා මෙදා තුර ශ්‍රී ලංකා ඉතිහාසයේ පහළ වූ අසහාය කායවර්ධන ශිල්පියා වන ආසියාවේ කළු සිංහයා නමින් විරුදාවලිය ලත්, වර්තමාන ආසියානු සමස්ථ කායවර්ධන ශූරතාවය හිමි ලූෂන් පුෂ්පරාජ් මහතා මෙවර ලංකා ඉතිහාසයේ කිසිදු කායවර්ධන ශිල්පියෙකුට නොලැබුනු අවස්ථාවක් හිමි කර ගනිමින් යුරෝපීය තරඟ බිමට යාමට සූදානමින් සිටී.

ඔහු පසුගියදා ඇමරිකාවේ ‘ලෝක කායවර්ධන සංගමය‘ වාර්ෂිකව පවත්වන ‘මිස්ටර් ඇට්ලස් -2017‘ ලෝක තරඟයෙන් රටවල් හතලිස් ගණනක අපේක්ෂකයන් පරදවා ලෝකයේ සිව් වැනි තැනට පත්ව ‘ආශ්වාදයේ සම්මානය‘ හෙවත් ‘Inspiration Award‘ දිනාගත් ලංකාවේ එකම කාය වර්ධන ශිල්පියා ය.

ඇමරිකානු තරඟාවලියෙන් පසු මාස 5ක පමණ කාලයක සිට ඉතා දුෂ්කර හා වෙහෙසකාරී පුහුණුවීම් වල නියැළී සිටින ලූෂන් මෙම වසරේ ප්‍රථමයෙන්ම සහභාගි වන තරඟාවලියද මෙය වේ. මෙම තරඟාවලියේ සුවිශේෂත්වයන් වනුයේ තරඟය පැවැත්වෙන ඔස්ට්‍රියාව යනු ලෝක පූජිත කායවර්ධන ශිල්පියා වන ඇමරිකාවේ කැලිෆෝනියා ප්‍රාන්තයේ හිටපු ආණ්ඩුකාර සුපිරි නළු ආර්නෝල්ඩ් ෂ්වසෙන්ගර් මහතාගේ මව්රට වීමය. ආර්නෝල්ඩ් පළමුවරට කාය වර්ධන ශිල්පියෙකු ලෙස නැගී ආවේ ඔස්ට්‍රියාවෙනි. යුරෝපයේ මෙම තරඟාවලිය පැවැත්වෙන්නේ 9 වන වරට ය.

ඔස්ට්‍රියාවේ වියානා හිදී පැවැත්වීමට නියමිත මෙම තරඟාවලියට යුරෝපයේ නම රැන්දූ කායවර්ධන ශූරයින් සහභාගිවීමට නියමිතව ඇති අතර එහි තරඟ සංවිධායකින් ලූෂන් පුෂ්පරාජ් හඳුන්වන්නේ දැනට යුරෝපයේ කායවර්ධන ශූරයන් වන Armin Gangle හා Stefan Wotawa හට ඉතා දැඩි අභියෝගයක් එල්ල කළ හැකි එකම ක්‍රීඩකයා ලෙසටයි.

ලූෂන් 2017 වසරේ 51 වන ආසියානු කායවර්ධන ශූරතාවලියේ ආසියානු රටවල් 29 ක් පරදවමින් කි.ග්‍රෑ. 100 ට වැඩි බර පන්තියේ සහ එම සමස්ථ තරඟාවලියේම සමස්ථ ශූරතාව දිනාගත් අතර ඇමරිකාවේ ටෙක්සාස්හි පැවැති මිස්ටර් ඇට්ලස් තරඟාවලියේ 4 වන ස්ථානය සහ Inspiration Award ලබා ගනිමින් ශ්‍රී ලංකාවට ජාත්‍යන්තර කීර්තියක් ගෙනාවේය.

08 වතාවක් Mr.Olympia ලෙස අභිෂේක ලත් ලෝක පූජිත කායවර්ධන ශූරයා වන Ronnie Coleman හා ඔහුගේ පුහුණුකරු වන Big J මහත්වරුන්ගේ මඟපෙන්වීම හා උපදේශකත්වය යටතේ මේ වන විට සුවිශේෂී පුහුණුවක් ලබමින් සිටින ලූෂන් ලංකා ඊ නිවුස් අමතා ප්‍රකාශ කර සිටියේ තමාගේ එකම අධිෂ්ඨානය 9 වන ඔස්ට්‍රියා ශූරතාව ශ්‍රී ලංකාවට අත්කර දීම බවයි.

ඔස්ට්‍රියාවේ වියානා හිදී පැවැත්වෙන ලූෂන් සහභාගී වන තරඟාවලිය මැයි මස 19 වන සෙනසුරාදා දින සවස 2.00 ට වියානාහි Lugner City Hall හිදී පැවැත්වෙන අතර ඔහුව දිරිගැන්වීමට සිංහ ධජය රැගෙන පැමිණෙන ලෙස ඒ අවට රටවල සිටින ශ්‍රී ලාංකික රසිකයින්ගෙන් සංවිධායකයන් සහ ලූෂන් ඉල්ලා සිටී.

මෙවරද ලූෂන් පුෂ්පරාජ් ගේ පූර්ණ අනුග්‍රාහකත්වය දරන්නේ ටෙක්සාස් ව්‍යාපාරික සමාජය අතර ජය කෙහෙළි නැංවූ ශ්‍රී ලාංකික ව්‍යාපාරයක් වන රියෝකොකෝ ලංකා (පුද්.) සමාගම හා ඇමරිකාවේ ටෙක්සාස් ප්‍රාන්තයේ සේහින්ස් ලින්ක් ජාත්‍යන්තර සමාගම විසිනි. ලූෂන් පුෂ්පරාජ් මේ වනවිට රියෝකොකෝ සන්නාම තානාපති වශයෙන්ද කටයුතු කරයි.

 

ක්‍රිඩා පුවත්

මෙවර අයි.පී.එල් තරගාවලියේ නොකඩවා තුන්වැනි ජයග්‍රහණයත් ලබා ගනිමින් ප්‍රසාද ලකුණු සටහනේ 4 වැනි ස්ථානය දක්වා පැමිණ ඇති මුම්බායි ඉන්දියන්ස් කණ්ඩායමේ පුහුණුකරු මහේල ජයවර්ධන ලොව හොඳම පුහුණුකරුවා බව මුම්බායි කණ්ඩායමේ හිමිකාරිනිය මෙන්ම ලොව 18 වැනි ධනවත්ම පුද්ගලයා වන මුකේෂ් අම්බානිගේ බිරිය වන නීටා අම්බානි ප්‍රකාශ කර ඇති බව ඉන්දියානු මාධ්‍ය වාර්තා කරයි.

අයි.පී.එල් තරගාවලියේ 41 වැනි තරගය ලෙස කල්කටා නයිට්රයිඩර්ස් කණ්ඩායම සමඟ කල්කටාහි ඊඩ්න්ගාඩ්න් ක්‍රීඩාංගණයේ පැවැති තරගයෙන් ලකුණු 102ක දැවැන්ත ජයග්‍රහණයක් මුම්බායි කණ්ඩායම විසින් වාර්තා කිරීමෙන් අනතුරුව පිටිය තුළට පැමිණි නීටා අම්බානි රෝහිත් ෂර්මා ඇතුළු මුම්බායි ක්‍රීඩකයන්ට සුබ පතමින් සුහද පිළිසඳරක යෙදී ඇත. එහිදී මුම්බායි නායක රෝහිත් ෂර්මා ලොව හොඳම සහ නිරහංකාරම නායකයා බවත් එම කණ්ඩායමේ පුහුණුකරු මහේල ජයවර්ධන ලොව හොඳම පුහුණුකරුවා බවත් නීටා අම්බානි ප්‍රකාශ කර තිබේ.

මේ අතර මෙවර අයි.පී.එල්. තරගාවලිය සදහා ශ්‍රී ලංකාවෙන් සහභාගි වන එකම ක්‍රීඩකයා වන අකිල ධනංජය ද මුම්බායි ඉන්දියන්ස් කණ්ඩායම නියෝජනය කරන අතර ශ්‍රී ලංකා වේගපන්දු යවන ක්‍රීඩක ලසිත් මාලිංග ද මුම්බායි කණ්ඩායමේ පන්දුයැවීමේ පුහුණු උපදේශකයකු ලෙස කටයුතු කරයි.

ක්‍රිඩා පුවත්

ශ්‍රී ලංකා පාපැදි සම්මේලනය විසින් පසුගියදා පැවැති විධායක කමිටු රැස්වීමේදී ගන්නා ලද තීරණයක් අනුව මින් ඉදිරියේදී ශ්‍රී ලංකාවේ පැවැත්වෙන සෑම පාපැදි තරගයක්ම සංවිධානයේදී, එම තරගය පසුපස ආධාරකරුවන්ගේ යතුරු පැදි හා වෙනත් වාහන ලුහුබැඳීම තහනම් කිරීමටත්, ඊට විකල්ප විසඳුම් ලෙසින් තරග සංවිධායකයන්ට උපදෙස් මාලාවක් නිකුත් කිරීමටත් පාපැදි සම්මේලනය තීරණය කර තිබේ.

මේ පිළිබඳව පොලිස්පතිතුමා හා ජ්‍යෙෂ්ඨ  නියෝජ්‍ය පොලිස්පති (රථවාහන) දැනුම්වත් කර සියලු පොලිස් ස්ථාන වෙත ඒ පිළිබඳ නව චක්‍ර ලේඛයක් යැවීමට හා ක්‍රීඩා අමාත්‍යංශය අනෙකුත් පාර්ශ්ව දැනුවත් කිරීමට ශ්‍රී ලංකා පාපැදි සම්මේලනය අද (09දා) පියවර ගත්තේය. ඒ අනුව ඉදිරියේදී මෙරට පාපැදි තරග පැවැත්වෙන අවස්ථාවලදී පාපැදි ක්‍රීඩක ක්‍රීඩිකාවන්ගේ ආධාර උපකාරය හා විනෝදය පිණිස ඔවුන්ගේ පිටුපසින් ධාවනය කරන යතුරුපැදි හා වාහන තහනම් වනු ඇත.

මෙම තීරණයත් සමග පහත සඳහන් ප්‍රතිලාභ තුළින් පාපැදි ක්‍රීඩාව වඩාත් ඉහළ ප්‍රමිතියකින් සංවිධානය කළ හැකි බව පාපැදි සම්මේලනය දන්වා සිටී

1. ශ්‍රී ලංකාවේ පාපැදි තරග ජාත්‍යන්තර ප්‍රමිතියෙන් යුතුව සංවිධානය හා මෙහෙයවීමට හැකිය.

2. සෑම ක්‍රීඩික ක්‍රිඩිකාවකටම සමාන ලෙස ආධාර උපකාර ලබාගැනීමට හැකිවීම හා තරගකරුවන්ට, ආධාරකරුවන් හෝ ක්‍රීඩා සමාජවලට ඒ සඳහා දැරීමට සිදුවන වියදම් අඩු වේ.

3. පාපැදි තරග පැවැත්වෙන අතරතුර මහජනතාවට මුහුණදීමට සිදුවන අපහසුතා මගහරවා ගැනීම හා ඒ තුළින් පාපැදි ක්‍රීඩාව කෙරෙහි මහජනතාවගේ ප්‍රසාදය හා ආකර්ෂණය දිනාගැනීමට හැකිවේ.

4. පරිසර හිතකාමී ක්‍රීඩාවක් වන පාපැදි ක්‍රිඩා තරග සංවිධානයේදී අවම වාහන සංඛ්‍යාවක් යොදා ගැනෙන අයුරින් මෙහෙයවීමෙන් ක්‍රීඩා ක්ෂේත්‍රයටත්, රටටත් පූර්වාදර්ශයක් ලබාදීමට හැකිවේ.

5. තරග විනිසුරුවන්ගේ කාර්යයභාරය පහසු කිරීම හා ඒ තුළින් තරග විනිශ්චය ඉහළ මට්ටමකට ගෙන ඒමට හැකිවේ.

6. තරගයට පරිභාහිර පාර්ශ්වයන්ගෙන් තරගයට සිදුවිය හැකි බාධාවන් වළක්වමින් තරග මෙහෙයවීමට හා නිසි ආරක්‍ෂාව ලබාදීමට ශ්‍රී ලංකා පොලීසියටද පහසු වේ.

ඉහත සඳහන් ප්‍රතිලාභ අත්කර ගැනීම සඳහා පාපැදි තරග පසුපස හඹා යන ආධාර යතුරුපැදි හා වෙනත් වාහන ධාවනය තහනම් කිරීම හා සමගාමීව පාපැදි තරග සංවිධායකයන් විසින් පහත සඳහන් නිතී හා කොන්දේසි අනුව එම තරග සංවිධානය කිරීමට පාපැදි සම්මේලනය උපදෙස් ලබා දී ඇත.

1. පාපැදි තරගයක් සංවිධානය කිරීමේදී හැකි සෑම අවස්ථාවකදීම එම තරගය ධාවන වටයක (අවම කි.මී. 10ක ) සංවිධානය කළ යුතුය. එම ධාවන වටයේ සුදුසු ස්ථානයක මාර්ගයේ වම්පස මීටර් 100ක පමණ ප්‍රදේශයක් ‘පෝෂණ කලාපය’ ලෙස සලකුණු කළ යුතු වේ. මෙම පෝෂණ කලාපයේ සිට ආධාරකරුවන්ට විනිසුරුවන්ගේ අධීක්‍ෂණය යටතේ ක්‍රීඩක ක්‍රීඩිකාවන්ට ආධාර කළ හැකි වේ.

2. ආරම්භය හා අවසානය නගර දෙකක් අතර හෝ එක් ස්ථානයකින් ආරම්භ කර එම ස්ථානයෙන්ම අවසන් වන ලෙස එක් ධාවන මාර්ගයක තරගය සංවිධානය කිරීමේදී තරග මාර්ගයේ තරගය ආරම්භ කර කී.මි. 40කට පසු හා අවසාන කි.මි. 20ට පෙර මීටර් 100ක ප්‍රදේශයක් සහිත ‘පෝෂණ කලාප’ අවම වශයෙන් 02ක් සංවිධායකයන් විසින් සූදානම් කළ යුතු අතර, ආධාරකරුවන් එම ස්ථාන සඳහා ප්‍රවාහනය කිරීමට කටයුතු කළ යුතුය.

3. මාර්ග (Road) තරග සඳහා ඉහත සඳහන් පරිදි තරග සංවිධානය සිදු කිරීමට අතිරේකව ‘පොදු තාක්ෂණික සේවා’ වාහන සංවිධායකයන් විසින් සැපයිය යුතුවේ. ඒ අනුව අවම වශයෙන් පොදු තාක්‍ෂණික සේවා මෝටර් රථ හෝ කැබ් රථ දෙකක් තිබිය යුතුය. එමෙන්ම තරගය පිටුපසින්ම යන Broom වාහනයේද පොදු තාක්‍ෂණික සේවා ලෙස අවම වශයෙන් අමතර රෝද තිබිය යුතුය.

4. මාර්ග (Road)  තරග සඳහා පළමු ශ්‍රේණියේ (Road) පාපැදි තරග කණ්ඩායම් සහභාගිත්වය අනුව පැවැත් වීමේදී සංවිධායකයන් විසින් කණ්ඩායමකට එක් වාහනයක් බැගින් සැපයිය යුතු අතර, පොදු තාක්‍ෂණික සේවා මෝටර් රථ අවම වශයෙන් 02ක් සංවිධායකයන් විසින් සැපයිය යුතු වේ.

ඉහත සඳහන් නව නිතී රිති අනුව මෙම මාසයේ සිට පැවැත්වෙන සියලුම පාපැදි දිස්ත්‍රික් ශූරතා පාපැදි තරගද, ක්‍රීඩා අමාත්‍යාංශය මගින් පැවැත්වෙන පළාත් හා ජාතික මහ ක්‍රීඩා උළෙල පාපැදි තරගද, පාපැදි සම්මේලනය විසින් මෙහෙයවන සියලුම තරගද පැවැත් වීමට කටයුතු කෙරේ.

 

ක්‍රිඩා පුවත්

මේ වාසනාව අතරින් අවාසනාව මතු වූ කතාවක්‌ ද? නැතහොත් අවාසනාව පලාගෙන වාසනාව ජයග්‍රහණය කරන කතාවක්‌ දැයි තිරණය කරන්නේ ඔබය. රියෑලිටි රූපවාහිනී තරගයකදී මෙන් ඒ තීරණය ඇත්තේ පාඨක ඔබ අතේය.

2017 යොවුන් පොදු රාජ්‍ය මණ්‌ඩලීය බොක්‌සිං තරගාවලිය සහ 2017 යොවුන් ලෝක ශූරතා බොක්‌සිං තරගාවලිය සඳහා ශ්‍රී ලංකාව නියෝජනය කළ හඟුරන්කෙත පල්ලේබෝවල ද්විතීයික විද්‍යාලයේ එම්. එච්. පී. මධුමාලි එරංගා ප්‍රියදර්ශනී දියණිය මෙවර තායිලන්තයේ පැවැත්වෙන 2018 යොවුන් ආසියානු බොක්‌සිං තරගාවලිය සඳහා සහභාගි වීමේ වාසනාව හිමිකර ගෙන ඇත.

ඒ වාසනාව පසුපසම එක්‌තරා අවාසනාවන්ත තත්ත්වයක්‌ උදාවීමේ පුවතක්‌ ද තිබේ. එරංගා මධුමාලි දියණියටත්, ඇයගේ පුහුණුකරුටත් ඒ සඳහා ගුවන් ටිකට්‌පත් ලබා ගැනීමට මුදල් නොමැති වීම හේතුවෙන් පල්ලේබෝවල මහා විද්‍යාලයේ ආචාර්ය මණ්‌ඩලය සහ සිසු දරු දැරියන් මේ සඳහා මුදල් ලබා ගැනීමට හඟුරන්කෙත අධ්‍යාපන කලාපයේ පාසල්වලත්, මහනුවර නගරයේත් ස්‌ටිකර් අලෙවි කිරීමේත් යෙදී සිටිති.

තායිලන්තයේ පැවැත්වෙන 2018 යොවුන් ආසියානු බොක්‌සිං තරගාවලිය නියෝජනය කිරීම සඳහා මුළු දිවයිනෙන් ම තේරී ඇත්තේ පාසල් ළමුන් සතර දෙනෙක්‌ පමණි. එයිනුත් ඒ සඳහා සහභාගි වන එකම ක්‍රීඩිකාව මධුමාලි එරංගා දියණියයි. අනික්‌ ක්‍රීඩකයන් තිදෙනා කොළඹ රාජකීය, හොරණ විද්‍යාරත්න සහ පිළිමතලාව ධීරානන්ද යන විදුහල් නියෝජනය කරති.

කිලෝග්‍රෑම් 48 බර පංතියෙන් තරග වදින මධුමාලි එරංගා දියණිය මේ දක්‌වා ශ්‍රී ලංකාවේ පැවැති කිසිදු බොක්‌සිං තරගයකින් පරාජය වී නොමැති අපරාජිත ක්‍රීඩිකාවකි. ඇයට මේ තත්ත්වය උදාකර දීමට ඉමහත් කැපවීමක්‌ කළ ඇයගේ පුහුණුකරු වන ක්‍රීඩා උපදේශක ජමිත ගයාන් බණ්‌ඩාර මහතා දැනට උද්ගත වී ඇති තත්ත්වය පිළිබඳව කරුණු පැහැදිලි කළේ මෙලෙසය.

“පල්ලේබෝවල වැනි දුෂ්කර ප්‍රදේශයක පිහිටි පාසලකින් මේ තරම් දක්‍ෂ බොක්‌සිං ක්‍රීඩිකාවක්‌ බිහිකර ගැනීමට හැකිවීම මගේත් මේ ප්‍රදේශයේත් භාග්‍යයක්‌. තායිලන්ත ගමන පිළිබඳ ලංකා ජාතික බොක්‌සිං සංගමය මගින් වෙනත් අයුරින් උපකාර කළත් ඒ සඳහා මූල්‍ය අනුග්‍රහයක්‌ දැක්‌වීමට ඉදිරිපත් වුණේ නැහැ.

මධුමාලි තායිලන්තයට කැඳවාගෙන යැමට නම් අනිවාර්යයෙන්ම ඇය සමඟ ගුරුවරියක්‌ ද යා යුතු වෙනවා. ඇයත් ඇයගේ පුහුණුකරු වන මටත්, ඇය සමඟ යන ගුරුවරියටත් යන තිදෙනාටම ගුවන් ටිකට්‌පත් වලටත්, දින 10 ක්‌ එහි නැවතීම සඳහා රුපියල් 1,76,000 ක්‌ පමණ වැය වෙනවා. දුෂ්කර පාසලක්‌ වන අපට ඒ තරම් මුදලක්‌ සොයා ගැනීම හරිම අසීරුයි. ළමයින්ගේ දෙමාපියනුත් ආර්ථික අතින් එතරම් පොහොසත් අය නෙවෙයි.”

“මේ නිසා දින ගණනාවක්‌ වෙහෙස වී කෙසේ හෝ ක්‍රීඩා අමාත්‍ය දයාසිරි ජයසේකර මහතා හමුවී තත්ත්වය පැහැදිලි කිරීමෙන් පසුව එතුමාගේ උපදෙස්‌ පරිදි ක්‍රීඩා අමාත්‍යාංශයෙන් අපිට ගුවන් ටිකට්‌පත් ලබා දුන් බව ස්‌තුති පූර්වකව සිහිපත් කරනවා. නමුත් අප්‍රේල් 19 වැනිදා තරගයට සහභාගි වීමට යා යුතු බැවින් ඒ සඳහා කල් මදි නිසා වීසා ලබා දීමට නොහැකි බව තායිලන්ත තානාපති කාර්යාලය පැවසුවා.

“ඊට පසු එහේ මෙහේ දුව පැනලා “තායි ට්‍රැවල්ස්‌ ඒජන්සියකින්’ මේ ගැන විමසන විට ඒ අය කීවේ වීසා ලබාදීමට නම් ඒ අයගෙන් ගුවන් ටිකට්‌පත් නැවත මිලදී ගත යුතු බවයි. ඒ අනුව රජයෙන් ලබාදුන් ගුවන් ටිකට්‌පත් භාර ගත නොහැකි බව කීවා. එක්‌ අයකුට රුපියල් 63,000 ක ටිකට්‌පතක්‌ ගත යුතු බවත් ඔවුන් පැවසුවා. අපිට වෙන කරන්න දේකුත් නැහැ. මධුමාලි මේ තරගය සඳහා අනිවාර්යයෙන් ම සහභාගි කරවිය යුතුයි. එසේ නොවුණහොත් ඒක ඇයට කරන විශාල අසාධාරණයක්‌.”

“ඒ අනුව මගේ ගමන අවලංගු කරලා, ගුරුවරියක්‌ සමඟ මධුමාලි තායිලන්තයට යෑවීමට අපි තීරණය කළා. මේ සඳහා රුපියල් 1,26,000 ක්‌ සොයා ගත යුතුයි. ඒකට මුදල් සොයා ගැනීමට ස්‌ටිකරයක්‌ මුද්‍රණය කරලා මේ දිනවල හැම තැනම අලෙවි කරනවා. මහනුවර නගරයේත් ඒවා අලෙවි කරනවා. කෙසේ හෝ මධුමාලි මේ තරගයට යවලා ඒකෙන් ජය ලබාගෙන ‘2018 යොවුන් ඔලිම්පික්‌ තරගාවලියට’ යැමට සුදුසුකම් ලබා ගැනීමයි අපේ එකම පරමාර්ථය.

නගරයේ සුපිරි පාසල් වල ක්‍රීඩක ක්‍රීඩිකාවන්ට ඇති පහසුකම්වලින් දහසෙන් එකක්‌වත් නොමැතිව බොක්‌සිං ක්‍රීඩාවෙන් විශිෂ්ට දස්‌කම් දක්‌වන මධුමාලි එරංගා ක්‍රීඩිකාවට 2018 යොවුන් ආසියානු බොක්‌සිං තරගාවලියෙන් ජය ලබා 2018 යොවුන් ඔලිම්පික්‌ තරගාවලියට සහභාගි වීමට සුදුසුකම් ලැබේවා. අපට දැන් ඉතිරිව ඇත්තේ ඒ ප්‍රාර්ථනය පමණය.

ක්‍රිඩා පුවත්

ශ්‍රී ලංකාවේ නම ජාත්‍යන්තරයට ගෙන ගිය ධාවන ශූරී ඩිලන්ත මාලගමුව ඉතාලියේ මොන්සා (MONZA) ධාවන පථයේ ඊයේ සහ අද  පැවැත්වීමට නියමිතව තිබු ඩිලන්ත මාලගමුව මහතාගේ තරග දෙකම අවලංගු කර ඇත.

තරගය සදහා ධාවන පථයේ ස්ථානය තේරීම සදහා පැවති තරගයට සහභාගි වෙමින් සිටි අවස්තාවේ හතරවන වටය ධාවනය කරමින් සිටින විට රථය අනතුරකට පත්වීම හේතුවෙන් එම රථය යථා තත්ත්වයට පත් කරගැනිමට නොහැකී නිසාවෙන් හෙට දිනයේ පැවැත්විමට නියමිත තරගයද නොපැවත්වෙන බව ඩිලන්ත මාලගමුව මහතා පවසාසිටී.

පසුගිය වසරේ ප්‍රථම වරට යුරොපයේ තරඟ සඳහා සහභාගි වූ අතර එහිදී පළමු තරඟයේ දෙවනී ස්ථානය ලබා ගත් අතර,දෙවන තරඟ‍යේ තුන්වන ස්ථානය ලබා ගේන ශ්‍රීලංකා ධජය ඉතාලී අහස් කුස සිසාරා ලෙලද වන්නට ඩිලන්ත මාලගමුව සමත් වීය.

ක්‍රිඩා අමාත්‍යාංශයක් තිබුනද නමට පමනක් සීමාවූ කිසිදු සහයක් නොදක්වන අවකාශයක් තුල දැඩි කැපවීමෙන් රට වෙනුවෙන් තරඟ කිරිම ගැන අප ඩිලන්ත මාලගමුව මහතාව අගය කරන්නේමු.

 

ක්‍රිඩා පුවත්

ලොව ටෙස්ට් හා එක්දින ක්‍රිකට් ලකුණුලාභීන්ගේ ලැයිස්තුවේ ප්‍රමුඛයා බවට පත්ව සිටින ඉන්දීය සුපිරි පිතිකරු සචින් තෙන්ඩුල්කාර් මහාමාර්ගයේ ක්‍රිකට් ක්‍රීඩා කරනු අයුරු දැක්වෙන වීඩීයෝවක් අන්තර්ජාලයට එක්කර ඇත.

මේ දිනවල පැවැත්වෙන ඉන්දියානු ප්‍රිමියර් ලීග් ක්‍රිකට් තරගාවලියේදී මුම්බායි ඉන්දියන්ස් කණ්ඩායමේ ප්‍රධාන උපදේශකයකු ලෙස කටයුතු කරන තෙන්ඩුල්කාර් ඔහුගේ මෝටර් රියෙන් ගමන් කරන අවස්ථාවේදී තරුණයන් පිරිසක් මාර්ගයේ අසල ක්‍රිකට් ක්‍රීඩා කරනු දැක වාහනයෙන් බැස නොපැකිළව එම තරුණයන් සමඟ ක්‍රිකට් ක්‍රීඩාවේ යෙදී සිටින අයුරු එම වීඩීයෝවෙන් දිස්විය.

එම අවස්ථාවේදී තෙන්ඩුල්කාර් ක්‍රීඩා කරන අයුරු දුටු මාර්ගයේ ගමන් කළ සෙසු පිරිසද තමන්ගේ වාහන නතර කරමින් මේ දෙස බලා සිටීම හේතුවෙන් සුළු වේලාවකින් වාහන තදබදයක්ද ඇති වී ඇති බවද පැවැසේ.

කෙසේ වෙතත් ක්‍රිකට් ලොව වසඟයට පත්කළ මෙම අසහාය පිතිකරු නිරහංකාරව කළ මෙම ක්‍රියාව එක් තරගයක් හෝ දෙකක් ක්‍රීඩා කොට ලොවම ජයගත් විලසින් හැසිරෙන බොහෝ ජාත්‍යන්තර ක්‍රිකට් ක්‍රීඩකයන්ට ගැඹුරු පාඩමක් මෙන්ම මානව හිතවාදී ආදර්ශයක් කියා දෙන බව නොඅනුමානය.

වීඩියෝව පහතින් නරඹන්න