ක්‍රිඩා පුවත්

ලක් මවට අභිමානයක් වෙමින් ආසියාවම ඉදිරියේ ශ්‍රී ලංකා මාතාව රනින් සැරසවීමට ශ්‍රී ලංකා කණිෂ්ඨ මළල ක්‍රීඩා කණ්ඩායම සමත් විය.

නොයෙකුත් බාධක අපහසුතා මැද ජපානයේ පැවති කණිෂ්ඨ මළල ක්‍රීඩා තරගාවලියේ, ශ්‍රී ලංකා කණිෂ්ඨ මළල ක්‍රීඩා කණ්ඩායමක් ඉතිහාසයේ වාර්තා කළ ඉහළම දස්කම වාර්තා කිරීමට ශ්‍රී ලංකා කණ්ඩායම සමත් විය.

එහිදි ශ්‍රී ලංකා කණිෂ්ඨ කණ්ඩායම රන් පදක්කම් 3ක් සහිතව මුලු පදක්කම් 9 දිනා ගත්තේ ආසියාවේ දැවැන්ත රටවල් අභිබවා පස්වෙනි ස්ථානයට මවුබිම ඔසවා තබමිනි.

විශේෂයෙන්ම ශ්‍රී ලංකා මළල ක්‍රීඩා කණ්ඩායමේ ක්‍රීඩකයන්ට සෙසු රටවල් සාපේක්ෂව බලද්දි පවතින්නේ අවම සම්පත් ය. ඔවුන්ට අනුග්‍රාහකයන් නැත. මුදල් නොමැති නිසා විදෙස් පුහුණුවීම් අත් හැර ගත් මෙම කණ්ඩායමේ ක්‍රීඩකයන් පිළිබදවද වාර්තා වේ.

මළල ක්‍රීඩාව ජනප්‍රිය නැති, මළල ක්‍රීඩාවට නිසි පිලිගැනීම හෝ අනුග්‍රාහකත්වය නොලැබෙන තත්වයක් මත මවුබිම නියෝජනය කරමින් මවුබිම දිනවූ මෙම ක්‍රීඩක ක්‍රීඩිකාවන් සම්පතක් වන්නේ එබැවිනි. ක්‍රිකට් වැනි ක්‍රීඩාවන්ට ලැබෙනා මූල්‍ය අනුග්‍රාහකත්වයෙන් 1% ක ශ්‍රී ලංකා මළල ක්‍රීඩාවට නොලැබෙන බවට සැකයක් නැත.

නිමාවූ ආසියානු කුසලාන කාන්තා ක්‍රිකට් තරගාවලියේ ශ්‍රී ලංකා කාන්තා කණ්ඩායම තායිලන්තය හමුවේ පරාජය විය. ශ්‍රී ලංකා ක්‍රිකට් කණ්ඩායම ඊයේ දිනයේ කොදෙව් කණ්ඩායම හමුවේ ලකුණු 226ක දැවැන්ත පරාජයක් ලැබීය. ශ්‍රී ලංකා ක්‍රිකට් කණ්ඩායමේ ක්‍රීඩකයන්ගේ වැටුප් මෑතකදී තවත් වැඩි වූයේය. සියලූ සම්පත්, අනුග්‍රාහකත්වය පවතින ක්‍රිකට් ක්‍රීඩාව එලෙසින් පරාජයන් ලබද්දි ඒ කිසිවක් නොමැතිව කණිෂ්ඨ මළල ක්‍රීඩක ක්‍රීඩිකාවන් මේ ලබා ගත් ජයග්‍රහනයන්ට මවුබිමේ උපහාරය හිමි විය යුතුය.

මේ අනුව රන් පදක්කම් තුනක් රන් 3 ක් ( මීටර් 400 – අරුණ දර්ශණ , මීටර් 3000 – පාරමී වසන්ති , 400*4 – අරුණ , පසිඳු , නිකු , රවිශංක ) , රිදී පදක්කම් 4ක් ( අමාෂා – මීටර් 100 , 200 , පසිඳු මීටර් 400 , දිල්ෂි මීටර් 400 ) ලෝකඩ 2ක් (දිල්ෂි මීටර් 800 , 400*4 – දිල්ෂි , සචිනි , රොමේෂි , අමාෂා ) මවුබිමට හිමි විය.

වරෙක මේ ක්‍රීඩකයන් කීප දෙනෙකුටම ජැමෙයිකාවේ පුහුණුවට යාමට පහසුකම් ලැබී තිබියදී වීසා ලබාගැනීමේ ගැටළුවට පවා බළධාරීන් මැදිහත් වී නොමැති බවත් සදහන් ය. තරගාවලියේ මීටර් 100 බාළිකා සහය දිවීමේ කණ්ඩායමක් සහභාගී කරවූවා නම් බොහෝවිට අපිට තවත් පදක්කමක් උරුම වීමට තිබුනි. බලධාරීන්ගේ අමන පූර්ව නිගමනය අනුව එය අපිට අහිමි විය.

කුලියාපිටිය මධ්‍ය මහා විද්‍යාලයේ පාරමී වසන්තී මාරිස්ටෙලා, ඓතිහාසික ජයක් වාර්තා කරමින් ශ්‍රී ලංකාවට රන් පදක්කමක් දිනා දීමට සමත් වූවාය.

වයස අවුරුදු 20 න් පහළ බාලක බාලිකාවන් වෙනුවෙන් පැවැත්වෙන, කණිෂ්ඨ ආසියානු මලල ක්‍රීඩා ශූරතාවලියේ දී, ඇය මීටර් 3000 බාධක දිවීමේ බාලිකා ඉසව්වට සහභාගීවෙමින් අද දැක්වූ දක්ෂතාව මිනින්තු 10:21.54 කි එය පුද්ගලිකව ඇය වාර්තා කර ඇති හොඳම දක්ෂතාව ද වේ.

මෙය ඇය එම ඉසව්වෙන් මීට පෙර වාර්තා කර තිබූ හොඳම කාලය 10:37.33 තත්පර 15 කින් පමණ අලුත් කිරීමක් ලෙසද සැලකිය හැකිය.

මෙම තරගාවලියේදී මිට පෙරද ශ්‍රී ලංකාව වෙනුවෙන් ආසියානු කණිෂ්ඨ වාර්තාවක් සමගින් මීටර් 400 ඉසව්වේ රන් පදක්කම දිනා ගැනීමට අකුරම්බඩ වීරකැප්පැටිපොල වි අරුණ දර්ශන සමත් විය.

ශ්‍රී ලංකා කණිෂ්ඨ මළල ක්‍රීඩා කණ්ඩායම පිළිබදව ෆේස්බුක් සමාජජාලයේ පළව තිබූ නිර්මාණ කිහිපයක් පහතින්,

ක්‍රිඩා පුවත්

මේ දිනවල දේශපාලනය මෙන්ම ක්‍රිකට් ක්ෂේත්‍රය ද දැඩි කතාබහට ලක් වී තියෙනවා.

ඒ වගේ අද උදේ එජාප කෘත්‍යාධිකාරී මණ්ඩලය රැස්වුණා.

මේ රැස්වීමේදී එජාපයේ ඉදිරි ගමන ගැන වගේම ශ්‍රී ලංකා ක්‍රිකට් ආයතනය ගැනත් කතාබහ කරලා තිබ්බා.

රංජන් රාමනායක සහ නවීන් දිසානායක යන මහත්වරු මේ රැස්වීමේදී ක්‍රිකට් ගැන අදහස් දක්වලා තිබ්බා.

හිටපු ක්‍රීඩා ඇමති දයාසිරි ජයසේකර සහ ක්‍රිකට් සභාපති තිලංග සුමතිපාල යටතේ ශ්‍රී ලංකා ක්‍රිකට් විනාශ වුණා කියලයි කෘත්‍යාධිකාරී මණ්ඩලයේ මතය වුණේ.

ක්‍රිකට් පරිපාලනයට ව්‍යාපාරිකයන් සහ බුකිකරුවන් නැතුව ක්‍රිකට් වලට ඇත්තටම ආදරය කරන පුද්ගලයින් පත් කරන්න ඕන කියලා රැස්වීමේදී යෝජනා වුණා.

කුමාර් සංගක්කාර, සිදත් වෙත්තමුණි වගේ ක්‍රිකට් වලට ආදරය කරන අය ඒකට ගොඩක් සුදුසුයි කියලා යෝජනා කරා.

ක්‍රිකට් නිලවරණයකින් හරි අතුරු පාලක කමිටුවකින් හරි ඔවුන්ට ශ්‍රී ලංකා ක්‍රිකට් ආයතනය බාර දෙන්න ඕන කියලයි කෘත්‍යාධිකාරී මණ්ඩලයේ මතය වුණේ.

අගමැතිතුමා කිව්වේ ලබන සඳුදා තියෙන පාර්ලිමේන්තු කණ්ඩායම් රැස්වීමේදී මේ යෝජනවා කරන්න කියලා.

එතනින් කැබිනට් මණ්ඩලයට මේ යෝජනාව ඉදිරිපත් කරන්නම් කියලා අගමැතිතුමා සඳහන් කරා.

ක්‍රිඩා පුවත්

තණතීරු සකස් කරන පුද්ගලයා යම් කණ්ඩායමකට අවශ්‍ය ආකාරයට තණතීරුව සකස් කර තිබේ නම් ක්‍රීඩකයන්ට දඬුවම් ලබා නොදී අදාළ නිලධාරීන්ට දඬුවම් ලබාදිය යුතු බව හිටපු ක්‍රීඩා අමාත්‍ය දයාසිරි ජයසේකර මහතා සඳහන් කළේය.

අද (28දා) ශ්‍රී ලංකා නිදහස් පක්ෂ මාධ්‍ය කේන්ද්‍රයේ පැවැති මාධ්‍ය සාකච්ඡාවකට එක්වෙමින් හෙතෙම මේ බව කියා සිටියේය.

තමා ක්‍රීඩා අමාත්‍ය ධුරය දරන කාලයේදී තණතීරු ප්‍රශ්නයක් ගැන ලසිත් මාලිංග ක්‍රීඩකයා පාර දිගේ කිය කියා ගිය බවත්, එහෙත් ලිඛිතව ඒ පිළිබඳව කිසිවක් ලබාදී නොමැති බවත් හෙතෙම මෙහිදී සඳහන් කළේය.

ඔහු පත්තරවලට හා තැන් තැන්වලට කණ්ඩායමට අවශ්‍ය තණතීරුව නොලැබෙන බවට කිය කියා ගිය බවත්, එහෙත් සිදුකිරීමට තිබුණේ තණතීරු ප්‍රශ්නය තිබූ තරගය නම් කර ලිඛිතව ලබාදීම බවත් ඒ මහතා පවසා සිටියේය.

ලසිත් මාලිංග එක එක ඒවා කියන නිසා ඒ පිළිබඳව සලකා බැලීමක් සිදුකිරීමට නොහැකි වූ බවත්, ලිඛිතව ලබාදුන්නා නම් පියවරක් ගැනීමට හැකියාව තිබූ බවත් වැඩිදුරටත් අදහස් දක්වමින් හිටපු අමාත්‍යවරයා සඳහන් කළේය.

අල් ජසීරා පුවත්සේවය මේ පිළිඳව සවිස්තරාත්මක මාධ්‍ය වාර්තාවක් පළ කළ අතර එයට සම්බන්ධ බව කියන ඔස්ට්‍රේලියානු ක්‍රීඩකයන්ට මේ වන විටත් ඔස්ට්‍රේලියා ක්‍රිකට් ආයතනය අනතුරු ඇගවීම් සිදුකර තිබේ.

ක්‍රිඩා පුවත්

වාණිජකරණයට ලක්වීමත් සමග ක්‍රිකට් ක්‍රීඩාව විවිධ වෙනස්කම් වලට ලක්වෙමින් පවති. පිතිකරුවන්ට හිතකර නව නිතී, අඩු කාලයක් තුල අවසන් වන තරග මේ වෙනස්කම්හි ප්‍රධානත්වයක් ගන්නවා. මේ අතර ක්‍රිකට් ක්‍රීඩාවේදි ලකුණු අටේ පහරක් හදුන්වා දිය යුතු බවට යෝජනාවක් ඉදිරිපත්ව තිබෙනවා.

සුප්‍රකට ක්‍රිකට් විස්තර විචාරකයකුද වන ඩීන් ජෝන්ස් මෙම යෝජනාව ඉදිරිපත් කර තිබේ. ‘ස්ටාර් ස්පෝර්ට්ස්’හී වැඩ සටහනකට සහභාගී වෙමින් ඩීන් ජෝන්ස් යෝජනා කරන්නේ, මිටර 85 වඩා දුරකට පන්දුව යන පරිදි එල්ල කෙරෙන ලබන පහරක් සඳහා ලකුණු 6ක් නොව ලකුණු 8ක් පිරිනැමිය යුතු බවයි.

එහිදි වැඩිදුරටත් අදහස් දක්වන ඩීන් ජෝන්ස් පවසා සිටියේ “8 පහර කදිමයි. ඔවුන් ක්‍රිස් ගේල්ට සහ සියලුම ප්‍රහාරකයන්ට ආදරය කරනවා. හරියට ගෝල්ෆ් වලදී ටයිගර් වුඞ්ස් සහ රොරි මැක්ලෝරි මිටර 350 වඩා ඈතට යන්න පහර දෙනවා වගේ”.

“තරගය තියෙන්නේ උච්චතම අවස්ථාවේ නම්, ඔවුන්ට අවශ්‍ය ලකුණු 8ක් නම්, මිටර 85 වඩා දුරකට පන්දුව යැව්වානම් හරි. ඔබ හිතන විදියට ක්‍රිස් ගේල් වෙන්න පුඑවන්, ඔන්ඩි්‍ර රසල් හරි කිරන් පොලාඞ් වෙන්න පුඑවන්. ඔවුන් එවිට එය ලබා ගනීවී” යනුවෙනි.

ක්‍රිඩා පුවත්

ලංකාවේ තියෙන ලස්සම ක්‍රිකට් ක්‍රීඩාංගනයක් තමයි ගාල්ල ජාත්‍යන්තර ක්‍රිකට් ක්‍රීඩාංගනය. එ් වගේම ලංකාවට වාසි දායක ක්‍රිකට් පිටියක් විදියටත් ගාල්ල ක්‍රිකට් ක්‍රීඩාංගනය ප්‍රසිද්ධයි. හැබැයි ගාලු පිටිය බුකීකරුවන්ට පවා දෙන්න හැදු මහා පාවාදීමක් අතටම හසුකර ගෙන තියෙනවා.අල්ජසීරා රූපවාහිනියේ මාධ්‍යවේදියෙක් තමයි මේ පාවාදීම හසු කර ගෙන තියෙන්නේ.

ඔහු ව්‍යාපාරිකයෙක් විදියට වෙස්වලාගෙන හිටපු ඉන්දීය ක්‍රීඩකයෙක් සමඟ ගාල්ල ජාත්‍යන්තර ක්‍රීඩාංගනයේ සහය කළමණාකරු හමු වෙලා තියෙනවා. ලක්ෂ 60 ක මුදලකට පිටිය බුකීකරුවන්ට ඕන විදියට වෙනස් කරන්න සහය කළමණාකරු කැමති වෙලා.මේ ගනුදෙනුවට ලංකාවේ දේශීය ක්‍රිකට් තරඟ ක්‍රීඩා කරන ක්‍රීඩකයෙකුත් සහය දීලා තියෙනවා. කොහොම වුනත් මේ ගනුදෙනුවේ සියලු අවස්ථා අල්ජසීරා මාධ්‍යවේදියා වීඩියෝ කරලා. එ් වීඩියෝ පට සමඟින් වංචා හෙළිකරන විශේෂ වැඩසටහනක් අද රාත්‍රියේදී අල්ජසීරා රූපවාහිනිය විකාශය කරන්න නියමිතයි.

එම වාර්තාව ඇතුලත් වීඩියෝව පහතින් ඔබට නැරඹිය හැකිය

ක්‍රිඩා පුවත්

ටෙස්‌ට්‌ ක්‍රිකට්‌ ක්‍රීඩක ධනංජය ද සිල්වාගේ පියා වන දෙහිවල ගල්කිස්‌ස නගර සභාවේ නාගරික මන්ත්‍රී රන්ජන් ද සිල්වා මහතාට පෙරේදා (24දා) රාත්‍රී වෙඩි තබා ඝාතනය කර ඇත්තේ රත්මලාන ප්‍රදේශයේ ක්‍රියාත්මක වන පාතාල කල්ලියක්‌ විසින් බව විමර්ශනවලින් අනාවරණය වී ඇත.

කාලයක්‌ තිස්‌සේ පැවැති ආරවුලක්‌ මෙම ඝාතනයට හේතු වී ඇති බවද පොලිස්‌ විමර්ශන වලින් හෙළි වී තිබේ.

මෙම ඝාතනය සම්බන්ධයෙන් ඊයේ වනවිට පුද්ගලයන් 21 දෙනකුගෙන් ප්‍රශ්න කර ඇතත් සැකකරුවන් කිසිවකු අත්අඩංගුවට ගෙන නොතිබිණි. මෙම ඝාතනය සඳහා පාතාල කල්ලිය විසින් ටී56 ගිනි අවියක්‌ සහ මිලි මීටර් 9 වර්ගයේ පිස්‌තෝලයක්‌ යොදාගෙන තිබූ අතර රන්ජන් ද සිල්වාගේ සිරුරට වෙඩි ප්‍රහාර 4 ක්‌ එල්ල වී තිබූ බව රෝහල් ආරංචි මාර්ග පැවැසීය.

රන්ජන් ද සිල්වා මහතා සිය හිතවතුන් දෙදෙනකු සමග රත්මලානේ ඥනේන්ද්‍ර මාවතේ පිහිටි නිවස ඉදිරිපිට සිටියදී පෙරේදා රාත්‍රී පාතාල කල්ලියක්‌ විසින් වෙඩි ප්‍රහාර එල්ල කර තිබිණි.

ප්‍රහාරයෙන් නාගරික මන්ත්‍රී රන්ජන් ද සිල්වා මහතා මියගිය අතර දෙහිවල ගල්කිස්‌ස නගර සභාවේ සේවකයෙක්‌ සහ ධීවරයෙක්‌ තුවාල ලැබූහ.

ඔවුන් කළුබෝවිල රෝහලේ ප්‍රතිකාර ලබමින් සිටිති. ඝාතකයන් මෝටර් රථයකින් පැමිණි බවට තොරතුරු ලැබී ඇති බවද පොලිසිය පවසයි.

ධනංජයගේ පියාගේ අභාවය සම්බන්ධයෙන් ලොව පුරාම ඔහුගේ ප්‍රේක්ෂකයන්, හිතවතුන් වගේම ක්‍රිකට් ලෝකයේ තරු රැසක් සංවේගය පළ කරලා තිබුනා.

ඒ අතරෙන් ඔහුත් එක්ක එකතුවෙලා දුක බෙදාගන්න, ප්‍රවීණ ක්‍රීඩක දෙපලක් වන මහේල ජයවර්ධන සහ ලසිත් මාලිංග ඊයේ ධනංජයගේ ගෙදරට ආවා. මේ තියෙන්නේ ඒ අවස්ථාවේ Video එක.

ක්‍රිඩා පුවත්

කලක් පාපන්දුවෙන් ලෝකයම වසගයට ගත් 38 හැවිරිදි Ronaldinho දැන් පාපන්දු ක්‍රීඩාවෙන් සමුගෙන ඉන්නේ.දෙවරක්ම බ්‍රසීලය නියෝජනය කරමින් ලෝක කුසලාන තරගාවලි නියෝජනය කළා.

තනිකඩ ජිවිතයක් ගත කළ Ronaldinho පසුගිය දෙසැම්බර් මස විවාහ වුණා.

ඒ විවාහයේදී ඔහු ආදරය කළ පෙම්වතියන් දෙදෙනාගේම මනාලයා වෙමින්.

ඒ කියන්නේ ඔහු දැන් එකවර කාන්තාවන් දෙදෙනෙක් විවාහ කරගත් පුද්ගලයෙක්.

ඔහු ඒ විවාහ වසන් කරගෙන හිටියත් දැන් ඒ ගැන මාධ්‍ය වාර්තා කර තිබෙනවා. මේ කාන්තාවන් දෙදෙනා සමග එකම නිවසක වෙසෙන බවයි කියන්නේ.

මේ බ්‍රසීල පාපන්දු ක්‍රීඩකයාට අදටත් බොහෝ තරුණියන් ආකර්ෂණය වෙනවා. ඒ ඔහුගේ ජනප්‍රියත්වයට වගේම ක්‍රීඩා රටාවට.

ජාත්‍යන්තර සම්මාන රැසකට හිමිකම් කියන ඔහු විවාහ වෙලා ඉන්නේ Priscilla Coelho හා Beatriz Souza යන යුවතියන් දෙදෙනාව.

මේ දෙදෙනා එක්ක සාමයෙන් සතුටින් ගත කරනවා කියලයි ඔහු කියන්නේ. මේ වනවිට මොහු කාන්තාවන් දෙදෙනෙක් සමග එකවර විවාහ වුණා කියන පුවත ලෝකය පුරාම පැතිරිලා.

ඔහු ඒ සම්බන්ධයෙන් මුණිවත රැක්කත් ඔහු කියන්නේ “මම ඕන තරම් ගැහැණු ළමයින්ට විවාහ ගිවිස ගැනීමට කැමැත්ත පල කරලා මුදු හුවමාරු කරගෙන තියෙනවා..” කියලයි

 

 

 

ක්‍රිඩා පුවත්

ආසියාවේ කළු සිංහයා කිව්වම මේ වෙද්දී ලෝකයේ නොදන්නා කෙනෙක් නැති තරම්. ඒ තමයි කායවර්ධන ශූර ලූෂන් පුෂ්පරාජ්. පහුගිය දවසක් යුරෝපය ආක්‍රමණය කරන්නත් ලූෂන් සමත් වුණා.

ඔස්ට්‍රියා අයෝමය පුරුෂයා තරඟයේ දෙවෙනි ස්ථානය දිනා ගන්න ලූෂන් සමත් වුණා. මේ තරඟාවලිය ඕස්ට්‍රියාවට ගිය ලූෂන් තවත් හපන් කමක් කරලා තිබ්බා. ඒ කිලෝග්‍රෑම් 3 ක් බර විශාල බර්ගර් එකක් විනාඩි 30 කින් සම්පූර්ණයෙන්ම කලා තිබ්බා.

මෙම අවස්ථාවේ ඔස්ට්‍ර්යා තානාපති කාර්යාලයේ නියෝජ්‍ය තානාපති නාමල් විජයමුනි සොයිසා මහතා සහ කායවර්ධන ශූර ලූෂන් පුෂ්පරාජ් මහතාගේ අනුග්‍රාහක  ලෙස කටයුතු කරන රියල් කොකො අධිපතිතුමාද සහභාගි වී සිටියා

මේ තියෙන්නේ බර්ගර් එක කන අවස්ථාවේ ඡායාරූප.

ක්‍රිඩා පුවත්

ශ්‍රී ලංකා ක්‍රිකට් අායතනය පහුගිය අවුරුද්දේ ලොකු ලාභයක් ලැබුවා. කොච්චර ලාභයක් ලැබුවද කියනවා නම් කෝදෙව්වන්ට ණය දෙන්නත් දැන් ක්‍රිකට් අායතනය සූදානමින් ඉන්නවා.

මේ නිසා ජාතික කණ්ඩායමේ ක්‍රීඩකයන්ගේ පඩි වැඩි කරන්නත් තීරණය කරලා තියෙනවා. ශ්‍රී ලංකා ක්‍රිකට් අායතනය එක්ක ක්‍රීඩකයින් 33 දෙනෙක් කොන්ත්‍රාත් අත්සන් කරලා තියෙනවා. එ් හැමෝටම කාණ්ඩ 5 ක් යටතේ පඩි වැඩි වෙනවා. 34% කින් තමයි ක්‍රිඩකයන්ගේ පඩි වැඩි වීම වෙන්නේ.

“එ්” කාණ්ඩයට අැතුලත් වෙලා තියෙන්නේ අැන්ජලෝ මැතිව්ස්, දිනේෂ් චන්දිමාල්, රංගන හේරත්, සුරංග ලක්මාල් සහ දිමුත් කරුණාරත්න. උපුල් තරංග සහ දිල්රුවන් පෙරේරා “බී” කාණ්ඩයට අැතුලත් කරලා තියෙනවා. කුසල් මෙන්ඩිස්, නිරෝෂන් දික්වැල්ල, ධනංජය ද සිල්වා, කුසල් ජනිත් පෙරේරා සහ තිසර පෙරේරා “සී” කාණ්ඩයට අැතුලත්.

ඩී” කොටසට අයත් වෙන්නේ අකිල ධනංජය, දුෂ්මන්ත චමීර, අසේල ගුණරත්න, ධනුෂ්ක ගුණතිලක හා නුවන් ප්‍රදීප්.

ප්‍රිමීයර් කාණ්ඩයට සධීර සමරවික්‍රම, රෝෂේන් සිල්වා, ළහිරු තිරිමාන්න, ළහිරු ගමගේ, විශ්ව ප්‍රනාන්දු, ලක්ෂාන් සඳකැන්, ජෙෆ්රි වැන්ඩසේ, දසුන් ශානක, කෞෂාල් සිල්වා, ෂෙහාන් මධුශංඛ, ළහිරු කුමාර, මලින්ත පුෂ්පකුමාර, අමිල අපොන්සු, වන්දු හසරංග, ඉසුරු උදාන හා ඩිල්ෂාන් මුණවීර අැතුලත්.

ක්‍රිඩා පුවත්

ගාමිණී දිසානායක මහතා ක්‍රිකට් ක්‍රීඩාවේ පරිණත ක්‍රීඩකයන් හා පුද්ගලයන් ළංකර ගනිමින් ක්‍රීඩාව දියුණු කිරීමට විශාල කැපවීමක් සිදුකළ බව ශ්‍රී ලංකා ක්‍රිකට් පිලේ හිටපු නායක, අමාත්‍ය අර්ජුණ රණතුංග මහතා ප්‍රකාශ කළේය.

‘ඒ වගේම කණ්ඩායම සමගත් ඉතාමත් කිට්ටුවෙන් සිටි කෙනෙක් තමයි ගාමිණි දිසානායකයන්. මම නැව් සංස්ථාවට ගියත්, පෙට්‍රෝලියම් අමාත්‍යවරයා වුණත් ඒ ගැන මට දැනුමක් තිබුණේ නෑ.

ඒ දේවල් ඉගෙන ගන්න ඒ පිළිබඳ පරිනත දැනුමැති පුද්ගලයන් එකතු කරගන්න සිදුවෙනවා. ගාමිණි දිසානායක මහතාගෙන් මා ඉගෙනගත්තු දෙයක් තමයි ඒක. එතුමාත් ක්‍රිකට් වලට ළංකරගත්තා ක්‍රිකට් ක්‍රීඩාවේ පරිනත පුද්ගලයන්, හොඳ දැනුමක් තිබුණු පුද්ගලයන්.

ශ්‍රීමනී දිසානායක මැතිනියත් එහෙමයි. අපේ ක්‍රීඩකයන්ගේ මෙන්ම විශේෂයෙන් ඒ කාලේ අපි වගේ නවක ක්‍රීඩකයන්ගේ මවයි පියයි ලෙස තමයි හැම විටම දිසානායක යුවළ කටයුතු කළේ.’

ස්පෝට් ඉන් ෆෝ සංවිධානයෙන් පසුගියදා කොළඹ ලක්ෂ්මන් කදිර්ගාමර් අනුස්මරණ සම්මන්ත්‍රණ ශාලාවේදී ශ්‍රී ලංකාවට වසර 1981දී ටෙස්ට් වරම් ලබාගැනීමේදී විශිෂ්ට සේවාවක් ඉටුකළ අභාවප්‍රාප්ත ගාමිණි දිසානායක මහතා වෙනුවෙන් සිදුකෙරෙන අනුස්මරණ දේශනය පවත්වමින් අර්ජුණ රණතුංග මහතා එසේ කීවේය.

‘මම මයන්තට (ගාමිණී දිසානායක මහතාගේ බාල පුතු) මේ බව මොහොතකට කළින් සඳහන් කළා ගාමිණි දිසානායකට පුතුන් දෙදෙනෙක් හා දුවෙක් සිටියා. ඇත්තෙන්ම මම වෙන්න ඇති හතර වැනි පුතා. එහෙමත් නැත්නම් මම වෙන්නැති පළමුවැනි පුතා. ඒ වගේ තමයි එතුමා මාව බලාගත්තේ.’

‘මේ දේත් සඳහන් කළයුතුයි කියා මම සිතෙනවා. මම එතුමාට විශේෂ ගෞරවයක් තිබුණු කෙනෙක්. මම ගිහින් කිව්වා දෙවැනි වරට අන්තිම වරට එතුමා මියයැමට පෙර එතුමාට නැවතත් ක්‍රිකට් පලක මණ්ඩ‍ලයේ සභාපති කමට එන්න කියා.

එතුමා එවකට ජනාධිපති අපේක්ෂකයකු ලෙස කටයුතු කරමින් සිටියේ. ක්‍රිකට් හදාගන්න නැවතත් ක්‍රිකට් පාලක මණ්ඩලයටයේ සභාපතිකමට එන්න කියා ඉල්ලිමක් කළා. එතුමා ඒ ඉල්ලීමට කැමැති වුණා.’

‘අවාසනාවකට වගේ එතුමාට අපි ලෝක කුසලානය දිනනවා දකින්න බැරිවුණා. ගාමිණි දිසානායකගේ පවුලේ උදවිය මේ බව දන්නවා සිම්බා‍බේ සංචාරයක් තිබුණා ලෝක කුසලානයට පෙර අපේ කණ්ඩායමට. මම ගියා එතුමා ඒ බව කියන්න.

මා පුරුද්දක් ලෙස හැම සංචාරයකදීම එතුමා දැනුවත් කර එතුමාට වැඳ ආශීර්වාද ලබාගන්නවා. එතුමාට වැඳ ආශිර්වාද ලබාගත් මොහොතේ එතුමා කී දෙයක් තමයි අර්ජුන මා සිටිද නැද්ද දන්නේ නෑ අර්ජුණ මතක තියාගන්න මේ සංචාරය සංචාරයක් පමණයි. ලෝක කුසලානය ගැන සැලැසුම් කරන්න. එතුමාට ඒ දර්ශණය තිබුණා. එතුමාට තිබුණා දැක්මක් අපිට ලෝක ලෝක කුසලාන දිනන්න පුලුවන් කියා.

මේ බව එතුමා දැනුවත් කරන්න ඇත්තේ සර් ගාෆීල් සෝබර්ස් මහත්තයා වෙන්න ඇති. සර් ගාෆීල් සෝබර්ස් මහතා පුහුණුකරුවකු ලෙස මෙරටට ගෙන්වුයේ ගාමිණි දිසානායක මහත්තයායි.’

‘අපි ලෝක කුසලානය දිනනකොට මට හිටියේ කණ්ඩායමක් නෙවෙයි. විශේෂයෙන් මෙතැන දරුවන් සිටින නිසා මේ බව කියන්න ඕනේ. මට කණ්ඩායමක් නෙවෙයි හිටියේ මට හිටියේ ක්‍රිකට් පවුලක්. ඒ වෙනස එතැන තිබුණා.

අද ඒ තත්ත්වය නෑ. ඒ වගේම අපි සංචාරයක් යනකොට මම මගේ අම්මාට පමණක් නොවෙයි. හෂාන්ගේ අම්මට, අරවින්දගේ අම්මට, රොෂාන්ගේ මව්පියන්ටත් වැඳලයි යන්නේ.

අපි සියලු ක්‍රීඩකයන් ඒ දේ කළා. අද තාක්ෂණයත් එක්ක ඒ දේ නෑ. අපිට තිබුණේ එවැනි ක්‍රිකට් සංස්කෘතියක්. අද ඒ තත්ත්වය නෑ. පිටරට දේවල් බලලා අද අපි ඒ අගය කළ යුතු සංස්කෘතිය විනාශ කරගත්තා. මම පිටරට දේශනයකට ගියත් හැම විටම අපට උරුමව තිබූ ඒ සංස්කෘතිය ගැන කියනවා.

මම තවමත් මගේ අම්මට වදින්නේ නැතුව පිටරට යන්නෙ නෑ. මේ දේවල් පිටරට තාක්ෂණය නිසා අපෙන් ගිලිහි ගොස් තිබෙනවා.’

‘විනය කියන එක මගේ නායකත්වය තුළ තිබුණා. මට ඒක කියා දුන්නේ ගාමිණි දිසානායක මහත්මයා. රටක වුණත් විනයක් තියෙන්න ඕනේ කියලා කිව්වේ එතුමායි. මමත් කණ්ඩායම තුළ විනය අනිවාර්ය කළා.’

පසුගියදා කොළඹ ලක්ෂ්මන් කදිර්ගාමර් අනුස්මරණ සම්මන්ත්‍රණ ශාලාවේදී පැවැති ගාමිණී දිසානායක අනුස්මරණ දේශනය සඳහා මයන්ත දිසානායක, ක්‍රීඩා අමාත්‍ය ෆයිසර් මුස්තාපා, ලෝක කුසලානය දිනා දිනූ ශ්‍රී ලංකා ක්‍රිකට් පිලේ හිටපු හෂාන් තිලකරත්න, හිටපු ක්‍රීඩක බ්‍රෙන්ඩන් කුරුප්පු, හිටපු ක්‍රිකට් සභාපති ආනා පුංචිහේවා, පාසල් ක්‍රිකට් කමිටුවේ ලේකම් ඩිල්ෂාන් ද සිල්වා මහත්වරු ඇතුළු අමුත්තන් රැසක් එක්වූහ.